საქართველოს პრემიერ-მინისტრმა ბიძინა ივანიშვილმა დამოუკიდებლობის დღისადმი მიძღვნილ სპეციალურ ტელემიმართვაში პირობა დადო რომ განსხვავებულობის გამო საქართველოში არავინ დაისჯებ: "პირობას გაძლევთ, განსხვავებულობის გამო, თავისუფალი აზრისთვის, თავისუფალი სიტყვისთვის არავინ დაისჯება. ჩვენ ერთგული ვართ ჩვენი ტრადიციების, ჩვენი ადათ–წესების, მაგრამ ახლის შეთვისება და შექმნაც ქართული ტრადიციის განუყრელი ნაწილია. ჩვენ ღირსეული უნდა ვიყოთ არა მარტო ჩვენი ტრადიციების ერთგულებაში, არამედ სხვათა წეს–ჩვეულებებისა და ტრადიციების პატივისცემაში. ჩვენ ყოველთვის კრიტიკულად უნდა მივუდგეთ როგორც ფსევდოტრადიციულობაში ჩაკეტილ, ქსენოფობიურ და ჰომოფობიურ მსოფლმხედველობას, ისე ყოველივე უცხოურის, ყოველივე ახლის დაუფიქრებელ, გაუაზრებელ მიმბაძველობას",-განაცხადა ივანიშვილმა. მისივე თქმით, ქართველი ხალხის მიზანია ისეთი სახელმწიფოს შენება სადაც პატივს ცემენ განსახვავებულ აზრს. ივანიშვილმა ასევე დემოკრატიულ ღირებულებებსა და ნატოში ინტეგრაციაზე გაამხვილა ყურადღება:  "დემოკრატიული ღირებულებები, ადამიანის უფლებები, ევროკავშირსა და ნატოში გაწევრიანება, მეზობელ ქვეყნებთან ურთიერთობის მოწესრიგება, დეოკუპაცია, კანონის უზენაესობის დამკვიდრება, თავისუფალი სასამართლო, თავისუფალი მედია – ეს ის საკითხებია, რომელიც საქართველოს დამოუკიდებლობის იდეის განუყოფელი ნაწილია. ეს არის ჩვენი უმთავრესი გამოწვევები და ჩვენ ღირსეულად უნდა გავუმკლავდეთ ამ გამოწვევებს. ჩვენ ყველას – თითოეულ მოქალაქეს ჩვენი წილი პასუხისმგებლობა გვაკისრია. საქვეყნო საქმეში ცალმხრივი პასუხისმგებლობა არ არსებობს. ამიტომაც მოქალაქეების მონაწილეობა ჩვენი ქვეყნის დემოკრატიული განვითარების პროცესში უაღრესად მნიშვნელოვანია. ჩვენი მიზანია ისეთი სახელმწიფოს შექმნა, სადაც პატივს სცემენ განსხვავებულ აზრს, სადაც ქსენოფობიასა და ჰომოფობიას არ აქვს გასაქანი, სადაც პატივს სცემენ ადამიანის არჩევანს, სადაც ეთნიკური და რელიგიური უმცირესობები საზოგადოების სრულფასოვანი წევრები არიან, სადაც მოქმედებს სამართლიანი კანონები და ამ კანონებს ემორჩილებიან, სადაც ბიზნესი თავისუფალია. ჩვენ უნდა გავხდეთ სტაბილური და ეკონომიკურად მიმზიდველი ქვეყანა. ყველაფერი უნდა ვიღონოთ, რომ ჩვენსკენ მოვატრიალოთ ჩვენი აფხაზი და ოსი ძმები და ერთად ავაშენოთ საერთო სახელმწიფო", - აღნიშნა პრემიერმა.