ნატო-ს გენერალური მდივნის სპეციალური წარმომადგენლის ჯეიმს აპატურაის განცხადებით, ნატო-ს ექსპერტები ავღანეთის ჰელმანდის პროვინციაში ქართველ სამხედროებზე განხორციელებულ თავდასხმას და მანამდე ინტერნეტით ანტიქართული ვიდეოკლიპების შორის შესაძლო კავშირს აანალიზებენ და დასკვნას უახლოეს დღეებში წარმოადგენენ. მან დაადასტურა, რომ გაერთიანებული ძალების სარდლობა და საერთაშორისო საზოგადოება ქართველი სამხედროების უსაფრთხოებას უზრუნველყოფას ყოველთვის შეეცდება. ამის შესახებ აპატურაიმ საზოგადოებრივი მაუწყებლისათვის მიცემულ ინტერვიუში განაცხადა. მან ქართველ ხალხის მომხდარის შესახებ კიდევ ერთხელ მიუსამძიმრა და ავღანეთში ქართველი სამხედროების ყოფნის მნიშვნელობაზე ისაუბრა. "საქართველო აჩვენებს ისეთ სიმტკიცესა და გაბედულობას, როგორც ალიანისის წევრი ქვეყნები, ეს ჩვენთვის ძალიან მნიშვნელოვანია და მივესალმებით. მინდა გითხრათ რომ მომხდარის გამო გენერალურმა მდივანმა ISAF-ის სარდლობას სთხოვა გარკვევა ყველა ინფორმაციის, რაც ადგილზე ქართველი ჯაროსკაცების უსაფრთხოებას უკავშირდება. ჩვენ რა თქმა უნდა გვაქვს ინფორმაცია იმ ვიდეოების შესახებ, რომელიც ჯიჰადს ეხება და გავრცელდა ინტერნეტით. ამიტომაც გვსურს ვიცოდეთ სრულყოფილად რა არის სინამდვილეში, რა არის რეალური და რა არა. თუკი ადგილზე გაზრდილია საფრთხე და გაზრდილია რისკები ქართველი ჯარისკაცების მიმართ ეს ინფორმაცია სრული, ღრმა ანალიზის შემდეგ გვეცოდინება. ველოდებით დასკვნებს. რა თქმა უნდა ეს გაკეთდება საქართველოს მთავრობის ჩართულობით, მათთან მჭიდრო კავშირში ვართ",- განაცხადა ჯეიმს აპატურაიმ. მისივე განმარტებით, 2014 წელს ISAF-ის ოპერაცია ნამდვილად დასრულდება, საბრძოლო მოქმედებები 2014 წლის 31 დეკემბერს შეწყდება, მანამდე კი გამოსვლა ეტაპობრივად მოხდება.