პოლიტიკური პარტიების ფინანსური მონიტორინგის სამსახურმა, პროკურატურიდან მიწოდებული მასალების შესწავლის შედეგად გამოავლინა, რომ „ერთიანმა ნაციონალურმა მოძრაობამ“ კანონის გვერდის ავლით, პარტიული მიზნებისთვის, დასაქმების პროგრამისთვის გათვალისწინებული საბიუჯეტო სახსრები გამოიყენა და მიიღო უკანონო შემოწირულობა 5 მილიონ 240 880 ლარი. ამის შესახებ პოლიტიკური პარტიების ფინანსური მონიტორინგის სამსახურის უფროსის მოვალეობის შემსრულებელმა ზურაბ აზნაურაშვილმა განაცხადა. მისი თქმით, 2012 წელს სოციალური მომსახურების სააგენტომ საქართველოს მთავრობის დასაქმების პროგრამის ფარგლებში, განახორციელა შრომითი ხელშეკრულებების დადება 21 837 პირთან , რომლებმაც განახორციელეს წინასაარჩევნო სააგიტაციო სამუშაოები პარტიის სასარგებლოდ. დადგინდა, რომ დასაკონტრაქტებელ პირთა სია ადგილობრივი თვითმმართველობების წარმომადგენლების მიერ შეადგინეს „ნაციონალური მოძრაობის“ პარტიული აქტივისა და მხარდამჭერებისგან, რომლებიც ინფორმირებულებიც არ იყვნენ დასაქმების პროგრამის ფარგლებში განსახორციელებელი საქმიანობის შესახებ. აღნიშნული ცხადყოფს, რომ რიგი სახელმწიფო უწყებების მიერ უგულებელყოფილი იქნა დასაქმების პროგრამისთვის გათვალისწინებული მიზნები და აღნიშნული თანხები მიმართული იქნა „ნაციონალური მოძრაობის“ სასარგებლოდ. შედეგად დადგინდა, რომ პარტიამ შრომის, ჯანმრთელობისა და სოციალური დაცვის სამინისტროსგან შემოწირულობის სახით მიიღო 5 მილიონ 240 880 ლარი. საქმე შესწავლისთვის მთავარ პროკურატურას გადაეგზავნება