საქართველოს პრეზიდენტი მიხეილ სააკაშვილი კატეგორიულად მოითხოვს მთავრობამ არჩილ კბილაშვილის თანამდებობიდან გადაყენების დოკუმენტი წარუდგინოს. ამის შესახებ განცხადება სააკაშვილმა ბათუმში გააკეთა. "მე ორი დღის წინ შევთავაზე პრემიერს წარმოადგინოს მთავრობამ არჩილ კბილაშვილი თანამდებობიდან გასათავისუფლებლად. პრემიერმა თქვა, რომ ის არ ეთანხმება ადამიანის ულებათა უხეში დამრღვევის, მთავარი სადისტის, ბედუკაძის შეწყალებას, რომელმაც მერე ეს კადრები გაყიდა და ვის მიყიდა, მე ძალიან კარგად ვიცი. პრემიერი გამოვიდა და თქვა, რომ ის ამას არ ეთანხმება. თუ ამას არ ეთანხმები, მაშინ უნდა წარმოადგინო მოსახსნელად ეს კაცი და მე, როგორც პრეზიდენტის უფლებამოსილებიდან გამომდინარე, ამ კაცს გავათავისუფლებ. თორემ ისე გამოვა, რომ იმან შეიწყალა, გაათავისუფლა პასუხისმგებლობისგან, ამათ დაგმეს და მერე ყველაფერი ჩვეულებრივად დარჩა, ვითომ არაფერი", - აღნიშნა სააკაშვილმა. პრეზიდენტის შეფასებით, თუ კბილაშვილის გათავისუფლების დოკუმენტს არ წარადგენენ, ეს ნიშნავს, რომ მთელი ეს შეშფოთება სრული თვალთმაქცობა იყო. "კიდევ ერთხელ კატეგორიულად ვთხოვ საქართველოს მთავრობას, იმის გამო, რომ მთავარმა პროკურორმა დაარღვია სამართლის უზენაესობის მთავარი პრინციპები, დაუყოვნებლივ წარმოადგინონ მთავარი პროკურორი გასათავისუფლებლად და და მე ამ შუამდგომლობას დღესვე დავაკმაყოფილებ. თუ ამას არ გააკეთებენ, ეს ნიშნავს, რომ მთელი ეს აღშფოთება, შეშფოთება ამ გადაწყვეტილებით იყო სრული თვალთმაქცობა და საქმე გვაქვს ძალიან ბინძურ თამაშთან, რომლის ერთადერთი მიზანია - ქართული საზოგადოების გასულელება და შეცდომაში შეყვანა და ვფიქრობ, საზოგადოება ამას არ წამოეგება", - განაცხადა პრეზიდენტმა.