რუსეთის პრემიერ-მინისტრმა, დიმიტრი მედვედევმა Russia Today–სთან ინტერვიუში რუსეთ საქართველოს ურთიერთობებზე ისაუბრა. მისი თქმით, რუსეთი მზად არის საქართველოსთან დიპლომატიური ურთიერთობები აღადგინოს იმ პირობით, თუ საქართველო 2008 წლის აგვისტოში მომხდარ ფაქტს აღიარებს. "მე შეგახსენებთ, რომ რუსეთის ფედერაციას არ გაუწყვეტია საქართველოსთან დიპლომატიური ურთიერთობები. ჩვენ მზად ვართ მის აღსადგენად გარკვეული პირობების შემთხვევაში. ეს მარტივია - აღიარება იმ ფაქტის, რაც მოხდა. შესაძლოა ეს პროცესი წავიდეს აკურატული, რთული გზით, თუმცა მე დარწმუნებული ვარ, რომ წარსულში დაბრუნება არ მოხდება. ამით ბოლო წლებში ყველაზე სამწუხარო ფურცელი ჩვენ ურთიერთობებში გადაიშლება და წავა მიხეილ სააკაშვილის და რამდენიმე პირის პოლიტიკური არენიდან გაქრობასთან ერთად",-განაცხადა მედვედევმა. რუსეთის პრემიერის განცხადებით, დღეს უკვე სხვა ვითარებაა და საქართველოს ახალ ხელისუფლებას გაცილებით პრაგმატული პოზიცია უჭირავს. "ჩვენ ამას მივესალმებით", - განაცხადა მედვედევმა. მან აგვისტოს მოვლენების დროს აშშ-ს პოზიციაზეც გაამხვილა ყურადღება და აღნშნა, რომ აღნიშნულ კონფლიქტში აშშ-მ "ორმაგი პოზიცია" დაიკავა, რაც სავარაუდოდ, დიდი იმედგაცრუება იყო საქართველოში "ზოგიერთი ჭკუის კოლოფისთვის". მედვედევის აზრით, ამერიკის შეერთებული შტატების ნებისმიერ პრეზიდენტს კარგად ესმის, რომ რუსეთთან კონფლიქტი არ შეიძლება. "იქ იყვნენ ცხელი თავები, ჩვენთვის ეს ცნობილია, მაგრამ ვფიქრობ, იყო ცივი განხილვები, რომ ამას შეიძლება სერიოზული კონფლიქტი მოჰყოლოდა. ეს კი არავის არ სჭირდება", -განაცხადა მედვედევმა. რუსეთის პრემიერი მიიჩნევს, რომ აღნიშნული კონფლიქტის შედეგად რუსეთმა მოახერხა, არ მოსვლოდა უკმაყოფილება მთელ სამყაროსთან, რაც, მისი თქმით, რუსეთისთვის უკიდურესად არამომგებიანი იქნებოდა. "რუსეთს რომ არაპროპორციული ძალა გამოეყენებინა, ან პირიქით, საერთოდ არ გამოეყენებინა, ყველაფერი შესაძლოა სხვანაირად ყოფილიყო. მიუხედავად იმისა, რომ ჩვენი მოქალაქეების და სამშვიდოებოების წინააღმდეგ აგრესია განხორციელდა, 5 დღეში აღვკვეთეთ ეს კონფლიქტი. მკაცრად, მაგრამ, ჩემი აზრით, სამართლიანად"-განაცხადა მედვედევმა. მისივე თქმით, იმის მიზეზი, რომ 2008 წლის აგვისტოს ომის გამო საქართველოს პრეზიდენტი, მიხეილ სააკაშვილი დღემდე არ დასჯილა, საერთაშორისო ინსტიტუტების. " რას ვიზამთ, საბოლოო განაჩენს ისტორია გამოიტანს. რაც შეეხება პოლიტიკურ განაჩენს, იმ გადაწყვეტილებების გამო, რომელიც მიხეილ სააკაშვილმა მიიღო, ქართველმა ხალხმა უკვე გამოუტანა. სააკაშვილის პოლიტიკურმა ძალამ 2012 წლის არჩევნებში კრახი განიცადა",-განაცხადა მედვედევმა. მედევდევი, რომელიც 2008 წელს პრეზიდენტის პოსტს იკავებდა, კიდევ ერთხელ აღნიშნავს, რომ არ შეეძლო არ ჩარეულიყო სამხრეთ ოსეთის კონფლიქტში, რადგან ამით უგულებელყოფდა თავისი ქვეყნის მოქალაქეების და ნაციონალურ ინტერესებს. მედევედევი ირწმუნება, რომ 2008 წლის აგვისტოში რუსეთის მიზანი არ იყო მიხეილ სააკაშვილის დამხობა ან დასჯა, არამედ რუსეთის მიზანი იყო "კავკასიაში მშვიდობის დასამყარებელი ოპერაცია" ჩაეტარებინა. მისივე თქმით, სააკაშვილის ბედი ქართველ ხალხს უნდა გადაეწყვიტა და არა რუსეთს. "ჩვენი მიზანი არ ყოფილა რეჟიმის შეცვლა, მიუხედავად იმისა, რომ ბატონი სააკაშვილი გასაგები მიზეზების გამო ჩემთვის და ჩემი კოლეგებისთვის აბსოლუტურად მიუღებელი პიროვნებაა. მე მას სამხედრო დამნაშავედ მივიჩნევ, თუმცა, ჩვენ ვთვლიდით და ვთვლით, რომ ხალხმა უნდა გაარკვიოს ურთიერთობები თავის ხელმძღვანელობასთან. მე არასდროს არ მიმიცია თბილისში შესვლის, პოლიტიკური რეჟიმის შეცვლის და სააკაშვილის დასჯის ბრძანება იმიტომ, რომ ჩვენ არ ვებრძოდით ქართველ ხალხს",-განაცხადა მედვედევმა. მან კიდევ ერთხელ დაადანაშაულა ქართული მხარე ცხინვალზე თავდასხმაში და აღნიშნა, რომ მხოლოდ ამ თავდასხმის შემდეგ მიიღო რუსეთმა გადაწყვეტილება, დაეწყო სამხედრო ოპერაცია. "ბოლოს კი ჩვენ მივიღეთ გადაწყვეტილება, გვეღიარებინა აფხაზეთის და სამხრეთ ოსეთის დამოუკიდებლობა",-განაცხადა მედვედევმა.