გორის სამხედრო ჰოსპიტალს აგვისტოს ომში გარდაცვლილი ექიმის, გიორგი აბრამიშვილის სახელი ეწოდა და მისი მემორიალური დაფა გაიხსნა, - ამის შესახებ თავდაცვის მინისტრმა, ირაკლი ალასანიამ ჰოსპიტლის თანამშრომლებს დღეს პირადად განუცხადა. ირაკლი ალასანია დღეს სამხედრო ჰოსპიტალში იმყოფებოდა, მან ჰოსპიტლის თანამშრომლებს სამხედრო ექიმის დღე მიულოცა და ჰოსპიტალი დაათვალიერა. "დღეს შეიარაღებული ძალები საქართველოს სამხედრო ექიმიების დღეს აღნიშნავს, ეს ძალიან მნიშვნელოვანი დღეა იმიტომ, რომ სამხედრო ექიმის პროფესია არის ორმაგად დასაფასებელი. ის იცავს საკუთარ სამშობლოს იარაღით ხელში და ასევე, საკუთარ თანამებრძოლებს. ძალიან ბევრი გმირობის მაგალითი გვქონდა, განსაკუთრებით რუსეთ-საქართევლოს აგვისტოს ომის დროს. გიორგი აბრამიშვილი, რომელიც არ დაემორჩილა ევაკუაციის გეგმას და მობრუნდა ჰოსპიტალში, რათა გამოემჟღავნებინა თავისი პროფესიული ერთგულება საკუთარი პროფესიის მიმართ, გახდა მსხვერპლი რუსეთის მხრიდან ნასროლი ნაღმის და ჩვენ მივიღეთ გადაწყვეტილება და მისი სახელი დავარქვით გორის სამხედრო ჰოსპიტალს", _ განაცხადა ირაკლი ალასანიამ.