საქართველოს პრეზიდენტმა თბილისში ეროვნული ბანკის ახალი საკასო ცენტრი გახსნა. გახსნის ცერემონიალზე დამსწრე საზოგადოებას მან სიტყვით მიმართა და ქვეყნის ეკონომიკურ განვითარებაზე ისაუბრა. მისი განცხადებით იმისთვის, რომ ქვეყანა რეგიონული მნიშვნელობის ფინანსური ცენტრი გახდეს,მთავრობა სპეციალურ პროექტებს ამზადებს. "მომავალ წელს ბათუმში დიდი ფინანსური ცენტრის მშენებლობა იწყება და იქმნება ცათამბჯენები. ლაზიკაში კომერციულ ტრანზაქციებზე ბრიტანული სამართალი შემოვა. ძალიან დიდ ექსპერიმენტზე მივდივართ, იმისთვის, რომ მივიღოთ კომერციული ტრანზაქციების მაქსიმალური დაცულობა, პირველ რიგში ქართველი და რა თქმა უნდა, უცხოელი ინვესტორებისთვის", - განაცხადა პრეზიდენტმა. მიხელ სააკაშვილმა ასევე ყურადღება ქვეყანაში ეკონომიკური მაჩვენებლის ზრდაზე გაამახვილა და აღნიშნა რომ შარშანდელ, 7%–იან მაჩვენებელთან შედარებით, მიმდინარე წლის ბოლოსთვის ქვეყანას სულ მცირე 8%–იანი ეკონომიკური ზრდის მაჩევენბელი ექნება.ქვეყნის პირველი პირი საკრედიტო სისტემის დახვეწის საკითხსაც შეეხო და განაცხადა, რომ მცირე და საშუალო ბიზნესის განვითარებისთვის, აუცილებელია დაბალპროცენტიანი სესხების დამკვიდრება. "პოსტსაბჭოთა სივრცეზე საქართველო პირველი ქვეყანაა, სადაც თანამედროვე ტექნოლოგიით აღჭურვილი საკასო ცენტრი აშენდა. ახალ საკასო ცენტრში დაინერგება ნაღდ ფულსა და სხვა ფასეულობებთან დაკავშირებული ოპერაციების აღრიცხვისა და ცენტრალიზებული კონტროლის მაღალტექნოლოგიური პროგრამები. ის ტექნოლოგიური დანადგარები, რომლითაც ახალი საკასო ცენტრია აღჭურვილი, მინიმუმამდე ამცირებს მიმოქცევაში გაცვეთილი ან ყალბი ფულის ნიშნების არსებობის რისკებს"განაცხადა ქვეყნის პირველმა პირმა.