"ვფიქრობ, ახალ წლამდე პოლიტიკიდან წავალ და აქტიურ საზოგადოებრივ საქმიანობას გავაგრძელებ. ჩემი აზრით, ჩვენი პრობლემა არა მთავრობაში, არამედ საზოგადოებაშია, რომელიც ძალიან გამოუცდელია და მცირე პოლიტიკური კულტურის მატარებელია. ყველაფერს ვიღონებ, მათი პოლიტიკური კულტურის ასამაღლებლად", - ეს განცხადება საქართველოს პრემიერ-მინისტრმა ბიძინა ივანიშვილმა სააგენტო "ბლუმბერგისთვის" მიცემულ ინცერვიუში გააკეთა. პოლიტიკიდან წასვლის სავარაუდო დროდ ივანიშვილმა დეკემბერი დაასახელა. ინტერვიუში პრემიერმა სამომავლო გეგმებზე ისაუბრა და აღნიშნა, რომ მომავალში ის საკუთარი ქონებიდან 1 მილიარდი დოლარის გაღებას გეგმავს კერძო ინვესტირების ფონდში, რომელიც ინვესტიციებს ახორციელებს ტურიზმის სფეროში, სოფლის მეურნეობისა და სხვა სფეროებში. "ბლუმბერგისთვის" მიცემულ ინტერვიუში ბიძინა ივანიშვილმა საქართველოს პრეზიდენტზეც ისაუბრა. "კანონის წინაშე ყველა თანასწორია. საქართველო იხრჩობოდა ელიტარულ კორუფციაში და სააკაშვილს, როგორც მინიმუმ, უნდა სცოდნოდა ეს, ან შესაძლოა ის მონაწილეობდა კიდეც. გამომძიებლებმა ეს უნდა დაამტკიცონ და სასამართლომ უნდა მიიღოს გადაწყვეტილება, თუმცა მასთან დაკავშირებით შეკითხვები არსებობს", - აცხადებს ბიძინა ივანიშვილი სააგენტოს ჟურნალისტთან საუბრისას.