სამედიცინო უნივერსიტეტის პროფესორი, თერაპევტი და კარდიოლოგი შალვა პეტრიაშვილი განცხადებას ავრცელებს, რომელშიც შს ყოფილი მინისტრის ციხეში მონახულებისა და ექიმთა კონსილიუმის შესახებ საუბრობს: „გუშინ ვიყავი ე.წ. მატროსოვის ციხეში ბატონ ვანო მერაბიშვილთან კონსულტაციაზე, ინტერნისტ გრიგოლ ხურციძესთან ერთად. გავსინჯეთ პაციენტი, გავეცანით ისტორიას და გამოკვლევების მონაცემებს. თითქმის ყველა გამოკვლევა ჩატარებულია. კიდევ საჭიროებს რამდენიმე კვლევას, რომლებიც ალბათ უახლოეს დღეებში ჩაუტარდება. ტელეჟურნალისტებთან ინტერვიუს დროს მე აღვნიშნე, რომ გულსისხლძარღვთა სისტემის მხრივ ამ ეტაპზე ახალი გამოკვლევის ჩატარება მას არ სჭირდება. როდესაც ვნახე ეს ინტერვიუ იქ რატომღაც ფრაზა - „გულსისხლძარღვთა სისტემის მხრივ ამ ეტაპზე“ - იყო ამოღებული და გამოვიდა ისე, თითქოს მე ვთქვი, რომ მას გამოკვლევა საერთოდ არ სჭირდება. მე და გრიგოლ ხურციძე შევთანხმდით იმ კვლევებზე, რომლებიც მას უნდა ჩაუტარდეს, იმაზეც, რომ მას ამ ეტაპზე სტაციონარული მკურნალობა არ სჭირდება და ეს დავაფიქსირეთ კიდეც ისტორიაში. ვის დასჭირდა ის ფაქტი, რომ თითქოს მე იგნორირება გავუკეთე ბატონ ვანოს პრობლემებს და არ ჩავთვალე საჭიროდ არც ერთი გამოკვლევის ჩატარება ჩემთვის გაუგებარია. პირიქით მე დავუდგინე ერთ-ერთი დაავადება გულისა, რომლის შესახებ მან არაფერი არ იცოდა და არც სხვას არ ჩაუთვლია ეს პრობლემად. მაგრამ ამ მხრივ მდგომარეობა სტაბილურია და არც ეს საჭიროებს ამ ეტაპზე ინტერვენციას. მედიაში გავრცელდა, რომ მე ვიყავი ამ კონსილიუმზე საპატრიარქოს წარმომადგენელი და მისგან გაგზავნილი, არც ეს შეესაბამება სიმართლეს. ამ სიტუაციაში საპატრიარქო საერთოდ არ ფიგურირებდა და მე საპატრიარქოსთან მაკავშირებს მხოლოდ ის, რომ ვარ პატრიარქის ერთ-ერთი კარდიოლოგი და ჩემს თავს ვერასოდეს ვერ მივცემ იმის უფლებას, დავირქვა საპატრიარქოს წარმომადგენელი. რაც შეეხება ასევე იმას, რომ მე ვიყავი ვინმეს მხარე ამ კონსილიუმში, არც ეს არის ასე - მე არავის მხარეს არ წარმოვადგენდი. ვიყავი ჩემი და იმ პაციენტის მხარე ვისთვისაც იქ მივედი. ექიმისა და პაციენტის ურთიერთობაში, რა ხარისხის დამნაშავეც უნდა იყოს ის, მხარეობა არ არსებობს. ექიმი ყოველთვის არის პაციენტის ინტერესების დამცველი“, აღნიშნავს ექიმი პეტრიაშვილი.