პრემიერმინისტრ ბიძინა ივანიშვილის სპეციალურმა წარმომადგენელმა რუსეთში ზურაბ აბაშიძემ მედიასთან რუსეთის საგარეო საქმეთა მინისტრის მოადგილესთან გრიგორი კარასინთან მისი მორიგი შეხვედრა შეაფასა. აბაშიძის განმარტებით, რუს კოლეგასთან შეხვედრაზე სავაჭრო და სატრანსპორტო კავშირების აღდგენაზე უნდა ესაუბრათ, თუმცა ადმინისტრაციულ საზღვარზე განვითარებული მოვლენების გამო, აბაშიძემ ფორმატი დაარღვია და საქართველოს მთავრობის სახელით ღმა შეშფოთება და მკვეთრად უარყოფითი პოზიცია დააფიქსირა. ზურაბ აბაშიძის განცხადებით, 19 სექტემბერს პრაღაში, ქართულ-რუსული პირდაპირი დიალოგის ფარგლებში მორიგი, რიგით მეოთხე შეხვედრა გაიმართა. „შეხვედრების მიზანია, რომ ჩვენი საზოგადოება მაქსიმალურად დეტალურად იყოს ინფორმირებული ქართულ-რუსული პირდაპირი დიალოგის შედეგების შესახებ. ეს შეხვედრები გასული წლის დეკემბერში ჟენევაში დაიწო. ჩვენ მაშინ შევთანხმდით გარკვეულ პრინციპებზე, ჩამოვაყალიბეთ თემები და ჩვენი მანდატი, ანუ რაზე უნდა გვემსჯელა და რა სახის პრობლემები უნდა მოგვეგვარებინა საწყის ეტაპზე. ამ ფორმატის ფარგლებში. იმის გამო, რომ არსებობს ჟენევის საერთაშორისო კონსულტაციები, ჩვენი პირველი შეთანხმება იყო, რომ ორმხრივი დიალოგის ფარგლებში, არ შევეხებით იმ პრობლემებს, რომელსაც ჟენევაში განიხილავენ“ - განაცხადა ზურაბ აბაშიძემ და განმარტა, რომ ჟენევაში, უაღრესად რთულ თემებს განიხილავენ, ეს არის უსაფრთხოების საკითხები, ჰუმანიტარული პრობლემები. აბაშიძემ ის თემები დაასახელა, რომელზეც შეხვედრაზე უნდა ემსჯელათ. „ეს თემები გახლდათ სავაჭრო ურთიერთობებისა და სატრანსოპრტო კავშირების აღდგენა, ჰუმანიტარულ-კულტურული ურთიერთობები. ჩვენ ამ პერიოდის განმავლობაში ვმუშაობდით ამ თემებზე. ძალიან ბევრი სირთულის გადალახვა მოგვიწია “ - განაცხადა აბაშიძემ აბაშიძემ მისი მორიგი გამგზავრების წინა პერიოდი გაიხსენა და შეშფოთება გამოთქვა საოკუპაციო ზოლთან განვითარებული მოვლენების გამო. „ამჯერად კმაყოფილი მივდიოდი მორიგი შეხვედრის ჩასატარებლად, მაგრამ ის რაც მოხდა წინა დღეებში საოკუპაციო ზოლზე და იქ როგორ განვითარდა მოვლენები, რა თქმა უნდა უარყოფითად აისახა ჩვენს შეხვედრაზე. ყოველი ჩვენი შეხვედრის წინ, ასეთი განსაკუთრებული დაძაბვა ხდება. საოკუპაციო ზოლთან. საქართველოს მთავრობის სახელით, მე გამოვხატე ღრმა შეშფოთება და ჩვენი მკვეთრად უარყოფითო პოზიცია დავაფიქსირე“ -განაცხადა აბაშიძემ.