დღეიდან, საერთაშორისო მისიაში გამგზავრებამდე, ქართული ქვედანაყოფის შეხვედრა მუსლიმთა რელიგიური კულტის მსახურთან ტრადიციულ ხასიათს მიიღებს. ISAF-ის მისიაში გამგზავრებამდე, ქართველი სამხედროები, საქართველოს შეიარაღებული ძალების ისტორიაში „ჯუმა მეჩეთში“ პირველად შეხვდნენ საქართველოს სრულიად მუსლიმთა კავშირის შეიხს ვაგიფ აქპეროვს. შეიხმა საქართველოს შეიარაღებული ძალების III ქვეითი ბრიგადის 31-ე ბატალიონის სამხედრო მოსამსახურეებს ისლამის შესახებ ლექცია წაუკითხა და ავღანეთის ისლამურ რესპუბლიკაში არსებული შეზღუდვები, ასევე ავღანელი ხალხის ადათ-წესები გააცნო. ლექციის ბოლოს, მუსლიმთა რელიგიური კულტის მსახურმა სამხედროები დალოცა, მისიის წარმატებით განხორციელება და სამშობლოში მშვიდობით დაბრუნება უსურვა. მან საქართველოს თავდაცვის მინისტრს ქართველ სამხედროებთან შეხვედრისთვის მადლობა გადაუხადა და აღნიშნა, რომ ისლამის წესების გაცნობა თითოეულ სამხედროს მისიის შესრულებისას გამოადგება. ქართველ სამხედროებთან ერთად, „ჯუმა მეჩეთში“ შეიხის ლექციას საქართველოს თავდაცვის მინისტრი ირაკლი ალასანია და გაერთიანებული შტაბის უფროსი, პოლკოვნიკი ირაკლი ძნელაძე დაესწრნენ. „ავღანეთის საერთაშორისო მისიაში გამგზავრებამდე მივიღეთ გადაწყვეტილება, რომ ყველა ჯარისკაცი მუსლიმანურ კულტურასა და ტრადიციებს უნდა გაეცნოს, რადგანაც ჩვენ ჩავდივართ იქ ავღანურ საზოგადოების დასახმარებლად. ადგილობრივი მოსახლეობის კეთილგანწყობის დამსახურება მხოლოდ და მხოლოდ იმ შემთხვევაში შეიძლება, თუ კარგად იცნობ მათ ტრადიციებს. აქ არიან ჩვენი მუსლიმი თანამოქალაქეებიც, ჯარისკაცები და ქრისტიანებიც. ეს მნიშვნელოვანი ხიდი უნდა გახდეს საზოგადოებასა და ჩვენ ჯარს შორის ავღანეთში ამ ურთიერთობის დასამყარებლად. ამგვარი შეხვედრა მათ თვალსაწიერს ზოგადად ცხოვრებაშიც გაუზრდის. საქართველო მრავალეთნიკური, მრავალრელიგიური ქვეყანაა, რომელსაც ეს ტრადიციები საუკუნეების განმავლობაში მოგვსდგამს“ - განაცხადა ირაკლი ალასანიამ. 31-ე ბატალიონის სამხედროები როტაციის წესით III ქვეითი ბრიგადის 33-ე ბატალიონს ჩაანაცვლებენ. 31-ე ბატალიონი ავღანეთის საერთაშორისო მისიაში მონაწილეობას უკვე მეორედ მიიღებს. ISAF-ის მისიის შესრულება პირველად სწორედ ამ ბატალიონის სამხედროებმა 2010 წლის აპრილიდან დაიწყეს. ბათუმის ცალკეული მსუბუქი ბატალიონი მისიას ამერიკული კონტინგეტის შემადგენლობაში ჰელმანდის პროვინციაში, ბაზა „ლეზერნიკზე“ განახორციელებს.