29 სექტემბერს - 1 ოქტომბერს საქართველოში ევროკავშირის საბჭოს პოლიტიკური და უსაფრთხოების კომიტეტის წევრი ელჩების (PSC Ambassadors) ვიზიტი იგეგმება. აღსანიშნავია, რომ ამ ფორმატის ვიზიტი საქართველოში მეორედ იმართება. ვიზიტის ფარგლებში გაიმართება შეხვედრები საქართველოს აღმასრულებელი და საკანონმდებლო ხელისუფლების უმაღლესი და მაღალი თანამდებობის პირებთან. ასევე იგეგმება ევროკავშირის ელჩების დელეგაციის მიერ ევროკავშირის მონიტორინგის მისიის (EUMM) საველე ოფისისა და ცხინვალის რეგიონის საოკუპაციო ხაზის მონახულება; გარდა ამისა, გაიმართება შეხვედრები საქართველოში აკრედიტებული ევროკავშირის წევრი ქვეყნების ელჩებთან და სამოქალაქო საზოგადოების წარმომადგენლებთან. საგარეო უწყების ინფორმაციით, შეხვედრებისას განიხილება საქართველო-ევროკავშირის თანამშრომლობის გაღრმავების პერსპექტივები; საქართველოში უსაფრთხოებისა და სტაბილურობის საკითხები, მათ შორის, საქართველოს ოკუპირებულ ტერიტორიაზე არსებული მდგომარეობა და ამ თვალსაზრისით, ევროკავშირის როლის გააქტიურების მნიშვნელობა; ასევე, ქვეყანაში მიმდინარე პოლიტიკური სიტუაცია და რეფორმები. სამინისტროს ცნობით, ევროკავშირის საბჭოს პოლიტიკური და უსაფრთხოების კომიტეტი ევროკავშირის საბჭოს მუდმივმოქმედი ორგანოა, რომელიც ევროკავშირის 28 წევრი ქვეყნის ელჩისგან შედგება და ევროპული საგარეო ქმედებათა სამსახურს ექვემდებარება. პოლიტიკური და უსაფრთხოების კომიტეტის კომპეტენციას კრიზისული სიტუაციების მართვის საკითხებზე ევროკავშირის საპასუხო ქმედებების განსაზღვრა და შემდგომი რეაგირება წარმოადგენს. ასევე, აღნიშნული კომიტეტი უზრუნველყოფს ევროკავშირის ერთიანი საგარეო და უსაფრთხოების პოლიტიკის (CFSP) და ერთიანი უსაფრთხოებისა და თავდაცვის პოლიტიკის (CSDP) შემუშავებასა და განხორციელებას.