მთავარი პროკურორი არჩილ კბილაშვილი არ გამორიცხვას, რომ ხურჩაში 2008 წლის 21 მაისს განხორციელებულ ტერაქტთან დაკავშირებით მაღალი თანამდებობის პირების პასუხისმგებლობის საკითხი დადგეს. "გამოძიების კვალობაზე ეს მოსალოდნელია", - განუცხადა კბილაშვილმა ჟურნალისტებთან საუბრისას. მისივე განმარტებით, გამოძიების პირველადი ვერსიით ტერაქტი სავარაუდოდ, სწორედ მაღალი თანამდებობის პირების მიერ იყო ორგანიზებული. "ამ საკითხთან დაკავშირებით გამოძიება მიმდინარეობს, ის ინფორმაცია, რაც შსს-მ გაავრცელა, არის პირველადი და ის მიუთითებს საგამოძიებო ორგანოს ვარაუდზე, რომ ტერაქტი იქნა ორგანიზებული სავარაუდოდ, მაღალი თანამდებობის პირების მიერ. დეტალები, თუ ვის მიერ, როგორ და რანაირად - მომავალი გვიჩვენებს", - აღნიშნა კბილაშვილმა. 2008 წლის 21 მაისს, ტერორისტული აქტის მოწყობის ბრალდებით დაკავებულები არიან შსს კონსტიტუციური უსაფრთხოების დეპარტამენტის აფხაზეთის ავტონომიური რესპუბლიკის მთავარი სამმართველოს ყოფილი უფროსი რომან შამათავა და სამეგრელო-ზემო სვანეთის სპეციალურ ღონისძიებათა ცენტრის განსაკუთრებულ დავალებათა დეპარტამენტის სამმართველოს ყოფილი თანამშრომელი მალხაზ მურღულია. სამინისტროს ინფორმაციით, 21 მაისს, საქართველოს საპარლამენტო არჩევნებში მონაწილეობის მიზნით სოფელ ხურჩაში მობილიზებული იქნა გალის რაიონის სოფელ ნაბაკევის მოსახლეობა, რომელიც საზოგადოებრივი ტრანსპორტის მეშვეობით აპირებდა ზუგდიდში გამგზავრებას. ამ დროს სოფელ ხურჩაში ტერორისტული აქტის განსახორციელებლად ჩასაფრებულმა რომან შამათავამ, მალხაზ მურღულიამ და მათმა თანამზრახველებმა, ავტომატური ცეცხლსასროლი იარაღიდან მრავალჯერადი გასროლით მშვიდობიან მოსახლეობაში პანიკა გამოიწვიეს, აგრეთვე, მალხაზ მურღულიამ "ერ პე გე"-ს ტიპის ყუმბართმტყორცნიდან განხორციელებული ორი გასროლით ააფეთქა ხალხის გადასაყვანად მობილიზებული ავტობუსები. აფეთქების შედეგად სრულად განადგურდა ორივე სატრანსპორტო საშუალება, ხოლო სიცოცხლისათვის სახიფათო ჯანმრთელობის მძიმე ხარისხის დაზიანება მიიღო მოქალაქე ნანი ქარდავამ.