პრეზიდენტის ინაუგურაციის პროგრამა ცნობილია. ინაუგურაციისადმი მიძღვნილი ღონისძიებები თბილისში ოთხ ადგილას გაიმართება. კერძოდ, პარლამენტის შიდა ეზოში, გმირთა მოედანზე, რუსთაველის თეატრში საზეიმო კონცერტი და უცხოელი სტუმრებისთვის მიღება გაიმართება. საქართველოს პრეზიდენტის ინაუგურაცია 13.00-13.45 საათამდე გაიმართება. "27 ოქტომბერს საქართველომ ნამდვილი ევროპული სტანდარტის არჩევნები ჩაატარა და შესაბამისად, ინაუგურაციაც ევროპული სტანდარტის იქნება. ევროპის დიდ ქვეყნებშიც კი ინაუგურაცია პარლამენტის შენობის სხდომათა დარბაზში ხშირად იმართება, თბილისში ჩვენ ამის საშუალება არ გვაქვს, ამიტომ ვიპოვეთ ოპტიმალური ვარიანტი იმისთვის, რომ ეს ინაუგურაცია იყოს სადა და რაც მთავარია, ძალიან დიდი თანხა არ დაჯდეს, ამიტომ გადავწყვიტეთ, ინაუგურაცია თბილისის პარლამენტის შიდა ეზოში ჩატარდეს. ამასთან, ეს თავიდან აგვაცილებს რუსთაველის გამზირის რამდენიმე დღით გადაკეტვას. გარდა ამ ღონისძიებისა, რომელსაც აუცილებლად ექნება სამხედრო კომპონენტი, შესრულდება საქართველოს ჰიმნი, მოხდება დროშის აღმართვა და სხვა რიტუალები, პატარა ცერემონიალი გმირთა მოედანზე გაიმართება, სადაც ფიცის დადების შემდეგ საქართველოს პრეზიდენტი გმირებს პატივს მიაგებს. გარდა ამისა, სავარაუდოდ, რუსთაველის თეატრში საზეიმო კონცერტი გაიმართება და უცხოელი სტუმრებისთვის გაიმართება მიღება. საზეიმო კონცერტში არ იქნება არც ერთი მოწვეული შემსრულებელი. ეს იქნება იმ ძალებით, რაც ქვეყანაში", - განაცხადა ფანჯიკიძემ. რაც შეეხება სამხედრო კომპონენტს, მინისტრის თქმით, ღონისძიებაზე არც მძიმე ტექნიკა იქნება და არც ავიაცია, არამედ მხოლოდ პირადი შემადგენლობა იქნება წარმოდგენილი. რაც შეეხება მოწვეულ სტუმრებს, ფანჯიკიძის განცხადებით, საზღვარგარეთ ქვეყნებში 70-მდე მოსაწვევია გაგზავნილი და ღონისძიებას არ დაესწრება რუსული დელეგაცია, გამომდინარე იქიდან, რომ ამ ქვეყანასთან საქართველოს დიპლომატიური ურთიერთობები არ აქვს. მინისტრისვე თქმით, ინაუგურაციაზე მიწვეული არიან საქართველოს პრეზიდენტები მიხეილ სააკაშვილი და ედუარდ შევარდნაძე, ასევე, პარლამენტის სრული შემადგენლობა. მინისტრი ვარაუდობს, რომ ინაუგურაციისადმი მიძღვნილი ღონისძიებების ხანგრძლივობა 13:00-დან 18:00 სთ-მდე გასტანს.