კოტე კუბლაშვილი იუსტიციის უმაღლესი საბჭოს სხდომაზე მოსამართლეთა არჩევასთან დაკავშირებით დაფიქსირებული შედეგით უკმაყოფილოა და ეჭვობს, რომ აღნიშნულის გამო საქმეების განხილვა გაჭიანურდება .საქართველოს უზენაესი სასამართლოს თავმჯდომარის განცხადებით, დღეისთვის მათ სულ მცირე 20 ახალი მოსამართლე ესაჭიროებათ, საქმეთა რაოდენობიდან გამომდინარე. "როგორც ცნობილია, დღეს ფარული კენჭისყრა გაიმართა. მოსამართლის ვაკანტური ადგილის დასაკავებლად ჩვენ 59 კანდიდატი გვყავდა, თუმცა აქედან მოსამართლედ არჩეულ იქნა მხოლოდ 12. პირდაპირ შემიძლია გითხრათ, რომ დღეისთვის ჩვენი საჭიროება საქმეთა რაოდენობიდან გამომდინარე არის სულ მცირე 20 ახალი მოსამართლე. სამწუხაროდ, მივიღეთ შედეგი, როცა დაინიშნა მხოლოდ 12 ახალი მოსამართლე და ჩვენი საჭიროებიდან გამომდინარე პირდაპირ შემიძლია გითხრათ, რომ ეს არის ძალიან ცუდი შედეგი, არა უბრალოდ ცუდი, არამედ ძალიან ცუდი შედეგი. შედეგი არ აკმაყოფილებს არავის. სასამართლო სისტემისთვის ეს არ არის მისაღები, თუმცა გამომდინარე იქიდან, რომ მოსამართლეების არჩევა მოხდა კანონის მიხედვით, ჩვენ გვეყოლება მხოლოდ 12 ახალი მოსამართლე და შევეცდებით, ისინი გადავანაწილოთ იქ, სადაც მეტი საჭიროებაა. ეს მძიმე შედეგს გამოიღებს იმ კუთხით, რომ შეიძლება საქმეები გაიწელოს და კანონით დათქმულ ვადებში ვეღარ იქნას განხილული, ვინაიდან რაოდენობრივად მოსამართლეები არიან ძალიან ცოტა", - აღნიშნა კუბლაშვილმა.