"ბლუმბერგის" ინფორმაციით, Time Warner Inc.-ის კუთვნილმა საკაბელო არხმა მაუწყებლობის გათიშვის გადაწყვეტილება რუსეთში მიღებული ახალი კანონის შემდეგ მიიღო, რომლის თანახმად მედია კომპანიების უცხოელ მფლობელებს რუსეთში ლიმიტები დაუწესდათ. "Turner Internationl განიხილავს რუსეთში CNN-ის გავრცელების ალტერნატიულ ვარიანტს, ქვეყანაში მედიის შესახებ კანონმდებლობაში განხორციელებული ბოლოდროინდელი ცვლილებების შესაბამისად. მანამდე კი, ჩვენ ვასრულებთ არსებულ ურთიერთობებს დისტრიბუციის სფეროში", - ნათქვამია კომპანიის განცხადებაში. გასულ თვეს, რუსეთის პრეზიდენტმა, ვლადიმერ პუტინმა ხელი მოაწერა კანონს, რომლის თანახმად რუსულ მედიასაშუალებებში უცხოელი მფლობელების წილი 2016 წლის ბოლოსთვის 20%-მდე უნდა შემცირდეს. CNN-ის ცნობით, რუსეთში მაუწყებლობას 2014 წლის 31 დეკემბრისთვის შეწყვეტს. რუსეთში ამერიკული ტელეკომპანიის წარმომადგენლობა 1983 წელს გაიხსნა. CNN 200-ზე მეტ ქვეყანაში მაუწყებლობს.