ბრაზილიის ფედერალური ოლქის ხელისუფლებამ რამდენიმე ქალაქში, სათამაშო იარაღების წარმოება–გაყიდვა აკრძალა, რაც ქვეყანაში ცეცხლსასროლი იარაღით ჩადენილ დანაშაულებათა ზრდამ გამოიწვია. აღნიშნულ ქალაქებში მცხოვრებმა ბავშვებმა ხელისუფლებას აკრძალული სათამაშოები წიგნებში უნდა გაუცვალონ, ხოლო მაღაზიები, რომლებმაც სათამაშოების რელიზაცია ვერ მოახდინეს, ფულად კომპენსაციას მიიღებენ. "ძალადობის კულტურის შეცვლა ბავშვობიდან უნდა დავიწყოთ. ჩვენი შვილები მაშინ მიხვდებიან იმას, რასაც ხშირად ვიმეორებთ: იარაღი სათამაშო არ არის!", — განაცხადა ბრაზილიის ფედერალური ოლქის დეპარტამენტის წარმომადგენელმა ალირიუ ნეტუმ (Alirio Neto). ფრანს–პრესის ინფორმაციით, 200–მილიონიან ქვეყანაში გასულ წელს 43 ათასზე მეტი მკვლელობა მოხდა, მათგან 73% ცეცხლსასროლი იარაღითაა ჩადენილი. სააგენტოს ინფორმაციით, 2004 წლიდან, როდესაც ბრაზილიაში ცეცხლსასროლი იარაღის ჩაბარების ნებაყოფლობითი აქცია დაიწყო, მოქალაქეებმა ხელისუფებას 600 ათასი ერთეული იარაღი ჩააბარეს. 2005 წელს ქვეყანაში იარაღის გაყიდვის აკრძალვის თაობაზე რეფერენდუმი ჩატარდა, თუმცა, ქვეყნის მცხოვრებთა 64% –მა მას ხმა არ მისცა. 22