ირანისა და და საერთაშორისო შუამავლების „ექვსეული“ ირანის ბირთვული პროგრამის დოსიეს მხოლოდ ჟენევაში, გაეროს შტაბ – ბინაში განიხილავენ. ეს გადაწყვეტილება, ირანის საგარეო საქმეთა მინისტრმა მოჰამედ ჯავად ზარიფმა და ევროკავშირის დიპლომატიის ხელმძღვანელმა, ქეთრინ ეშტონმა, ნიუ–იორკის შეხვედრაზე მიიღეს. მოლაპარაკებები ჟენევაში მანამ გაიმართება, სანამ ირანისა და „ექვსეულის“ შეხვედრის ადგილზე ახალ გადაწყვეტილებას არ მიიღებენ. "ექვსეულში" შედიან რუსეთი, აშშ, დიდი ბრიტანეთი, საფრანგეთი, ჩინეთი და გერმანია. „ექვსეულის“ კოორდინატორია ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში, ქეთრინ ეშტონი. ისრაელი, აშშ და დასავლეთის რიგი ქვეყნები ირანს ბირთვული იარაღის შემუშავების მცდელობაში ადანაშაულებენ, თუმცა ეს უკანასკნელი ამტკიცებს, რომ სამშვიდობო ატომის პროგრამაზე მუშაობს. თეირანი ყველა ბრალდებას უარყოფს და აცხადებს, რომ ბირთვული პროგრამა, მხოლოდ და მხოლოდ ქვეყნის ელექტროენერგიის მოთხოვნილებების დასაკმაყოფილებლად იქმნება.