"ზუგდიდის განვითარების ცენტრი"  ხელმძღვანელმა ანა წითლიძემ ცენტრის დაფინანსების საკითხთან დაკავშირებით საგანგებო ბრიფინგი გამართა.  მისი თქმით, ადგილობრივი თვითმმართველობა გარკვეულ პირებს ხელს უწყობს, რაც შეიძლება მეტი პროექტი შეიტანონ, რათა სასწავლო ცენტრს დაფინანსებაზე უარი უთხრან. წითლიძე, კომისიაში არასამთავრობო ორგანიზაციის წარმომადგენლების ჩართვას მიესალმება და იმედს გამოთქვამს, რომ ეს ობიექტურობის გარანტი იქნება. "ჩვენ გვაქვს ინფორმაცია, რომ ხდება სასწრაფო წესით სპეციალური პროექტების მომზადება, რომ კონკურსზე მარტო ზუგდიდის განვითარების ცენტრს არ ჰქონდეს შეტანილი ეს პროექტი.  ჩვენი მხრიდან ჩვენ ვაცხადებთ, რომ კონკურსი ღიაა და ნებისმიერს შეუძლია შეიტანოს პროექტი.  ჩვენ მზად ვართ ვუპასუხოთ ნებისმიერ შეკითხვას ეს იქნება კომისიაში თუ კომისიის გარეთ.  წარმატებები მინდა ვუსურვო ყველა არასამთავრობო ორგანიზაციას, იმათაც ვისაც საკუთარი სურვილით შეაქვს და იმათაც ვისაც ავალებენ,  რომ შეიტანონ ეს პროექტები. ზუგდიდის განვითარების ცენტრი იბრძოლებს ბოლომდე, რომ ეს ახალგაზრდები არ დარჩნენ გარეთ და მათ მიეცეთ განათლების შესაძლებლობა“, - ამბობს ანა წითლიძე. ცნობისთვის, გასულ კვირაში, დემოკრატიული ჩართულობის ოფისში არასამთავრობო ორგანიზაციის წარმომადგენლებმა ადგილობრივი ბიუჯეტიდან დაფინანსებული პროექტების შემსწავლელი კომისიის წევრები აირჩიეს, ესენია: გურამ ჩიხლაძე – “კვლევებისა და მონიტორინგის ცენტრი”, გერონტი ყალიჩავა – “მედია ფონდი”, რუსლან საჯაია-”ასოციაცია “ჰანგი”, კრისტინა კილანავა – ქალთა მოძრაობა “იმედი” და ხათუნა გოგუა- “აფხაზეთი ჩემი”. ზუგდიდის მუნიციპალიტეტის საკრებულომ ადგილობრივი ბიუჯეტიდან საზოგადოებრივი ორგანიზაციების პროექტების დაფინანსების პროცედურები და კრიტერიუმები კი, 27 იანვარს დაამტკიცა. დებულების თანახმად, არასამთავრობოების მიერ წარდგენილ პროექტებს 7-9 წევრიანი სპეციალური კომისია განიხილავს. აქედან, ოთხი წევრი ადგილობრივი ხელისუფლების წარმომადგენელი იქნება. ქალაქ ზუგდიდის მუნიციპლიტეტი ადგილობრივი ბიუჯეტიდან სოციალურად დაუცველი მოსახლეობის ჯანმრთელობისა და საყოფაცხოვრებო პირობების გაუმჯობესების მიზნით, არასამთავრობო ორგანიზაციების პროექტებს დააფინანსებს. ამისთვის ბიუჯეტში 30 ათასი ლარია გათვალისწინებული.