ხმაური იყო დღეს ზუგდიდის რაიონულ სასამართლოსთან, სადაც 3 ადამიანის მკვლელობაში ბრალდებულ დავით ბეჭვაიას წინასასამართლო პროცესი მიმდინარეობდა. აქ დაღუპულების ოჯახის წევრებმა და ახლობლებმა აქცია გაიმართეს. მათი უკმაყოფილება სხდომის დახურვამ გამოიწვია.

მოსამართლე შოთა ბიჭიამ სხდომა ხმაურის გამო დახურა,რადგან დაზარალებული და ბრალდებულის მხარეები ერთმანეთს დაუპირისპირდნენ.

გარდა ამისა, პროტესტი მოჰყვა ბრალდებულის სასამართლოს შენობის ეზოდან გამოყვანის პროცესს.  გარდაცვლილის ოჯახის წევრები მასთან მიახლოებას ცდილობდნენ. ადგილზე სამართალადამცველები იყვნენ მობილიზებულნი.

დაღუპულის ახლობლები ბრალდებულის უვადო პატიმრობას და საქმეში მთავარი პროკურორის ჩართვას ითხოვენ.

სისხლის სამართლის საქმე განზრახ მკვლელობის მუხლით არის აღძრული, (სსკ 109-ე მუხლის მე-3 ნაწილის "ა" და "გ" პუნქტები), რაც თავისუფლების აღკვეთას, ვადით თექვსმეტიდან ოც წლამდე ან უვადო პატიმრობას ითვალისწინებს.

ცნობისთვის, 10 თებერვალს სოფელ ურთაში სამი მამაკაცი დაიკარგა. ისინი მცირე მეწარმეები იყვნენ და ზუგდიდში მსხვილფეხა რქოსანი საქონლით ვაჭრობდნენ. გარდაცვლილებიდან ერთი ხობის მკვიდრია, ხოლო დანარჩენი ორი - ზესტაფონიდან იყვნენ.12 თებერვალს შსს-ს პოლიციის თანამშრომლებმა სამი მამაკაცის მკვლელობაში ბრალდებული სოფელ ნარაზენის მკვიდრი დავით ბეჭვაია დააკავეს. უწყების ცნობით, ბრალდებულმა მიმდინარე წლის 10 თებერვალს, ზუგდიდის რაიონის სოფელ აბასთუმანში, ხეცერის უბანში, ანგარების მიზნით, ცეცხლსასროლი იარაღიდან გასროლით თავისა და გულმკერდის არეში სასიკვდილო ჭრილობები მიაყენა სამ პირს და შემთხვევის ადგილიდან მიიმალა. სამივე დაჭრილი ადგილზე გარდაიცვალა.