ზვიად სიჭინავას უეფამ 10 წლიანი კონტრაქტი შესთავაზა - ამის შესახებ ინფორმაციას “პრაიმტაიმი” ავრცელებს.

საქართველოს ფეხბურთის ფედერაციის პრეზიდენტი ზვიად სიჭინავა, მალე თანამდებობას  დატოვებს. არჩევნების თარიღი უკვე ცნობილია და ის 3 ოქტომბერს გაიმართება. გაზეთის ინფორმაციით, არჩევნებამდე სიჭინავა პრეზიდენტის მოვალეობას შეასრულებს, მანამდე კი სფფ-ში აუდიტი შევა და დასკვნას დადებს. ზვიად სიჭინავას განცხადებით, ის ფეხბურთიდან მიდის და მომავალ არჩევნებში კენჭისყრას აღარ აპირებს.

ექსკლუზიურად, „პრაიმტაიმისთვის“ ცნობილი გახდა, რომ ევროპული ფეხბურთის მმართველმა ორგანომ ზვიად სიჭინავას სამსახური უეფაში შესთავაზა, თანაც საკმაოდ ხანგრძლივი ვადით. თუკი ზვიად სიჭინავა უეფას შეთავაზებას დასთანხმდება, ის აღნიშნულ უწყებასთან 10-წლიან კონტრაქტს გააფორმებს, სწორედ ასეთი პირობა შესთავაზეს მას  ნიონიდან.