რადიო ,,ათინათი’’ 1998 წელს ჩამოაყალიბა ამავე სახელწოდების არასამთავრობო ორგანიზაციამ ზუგდიდში. ამდენად რადიო ,,ათინათი’’ არის დამოუკიდებელი სადგური და არ ასოცირდება პოლიტიკურ თუ სახელისუფლებო სტრუქტურებთან. მისი სამიზნე აუდიტორიაა 25 დან 45 წლამდე ასაკის ორივე სქესის მოქალაქე. კვლევების მონაცემებით, რადიოტალღის გავრცელების არეალში 900 000 მდე ადამიანი ცხოვრობს, მსენელთა რაოდენობა დაახლოებით 35 000 შეადგენს, რასაც ემატება ინტერნეტით რადიოს მსენელთა რაოდენობა.
რადიო ,,ათინათს'' აქვს საკუთარი ვებგვერდი www.radioatinati.ge სადაც ყოველდღიურად იდება სამეგრელოს რეგიონში, ასევე ქვეყანასა და მსოფლიოში მიმდინარე ახალი ამბები. იტვირთება ახალი ამბების აუდიო ჩანაწერები. ფოტო და ვიდეორეპორტაჟები; დღის ფოტო, ვიდეო და ვებგამოკითხვები; გადაცემების და რუბრიკების აუდიო ჩანაწერები. ვებგვერდს ყოველთვიურად საშუალოდ ყავს 70 000 ვიზიტორი.
რადიო „ათინათი“ წელიწადში ორჯერ ახორციელებს ფოტო, ვიდეო და ესეების კონკურსს.
რადიო ,,ათინათი’’ - ის გადაცემათა ბადეში მუსიკის, მრავალფეროვანი რუბრიკებისა და გადაცემების გარდა არის ასევე სხვადასხვა ინტერაქტიული თოკშოუ, რომელთა თემატიკა ძირითადად სოციალურ და საზოგადოებისთვის სხვა პრობლემურ საკითხებს მოიცავს.
,,ათინათს“ ყავს პარტნიორები აფხაზეთში, რომლებთან ერთად აკეთებს ყოველკვირეულ ინტერაქტიულ გადაცემას.
IREX- ის M-TAG პროგრამის ხელშეწყობით ამჯერად რადიო ,,ათინათი“ განვითარების ახალ ეტაპზეა, რამაც ხელი უნდა შეუწყოს მისი ფინანსური მდგრადობის გაძლიერებას. პროგრამა ითვალისწინებს თანამშრომელთა უნარების განვითარებას ისეთ საკითხებში, როგორიცაა: ბიზნეს-გეგმის შემუშავება, სტრატეგიების შექმნა გაყიდვებსა და მარკეტინგში, ადამიანური რესურსების მართვა, ასევე მედია კონტენტის წარმოება, ჟურნალისტიკა და ახალი მედია.
რადიოს უახლეს მიზნებში შედის მაღალი სტანდარტების მულტიმედია პროდუქტების შექმნა. რადიოსთვის მობილური აპლიკაციების შექმნა როგორც ანდროიდის, ისე აიფონის სმარტფონებზე; ვიდეო ლაივ სტრიმით გადაცემების ტრანსლირება.
რადიოს დაგეგმილი აქვს 6 თვეში მსმენელთა და საიტის ვიზიტორთა რაოდენობის ორჯერ გაზრდა.
