ახალი ბიზნესი და სოფელში მოწეული მოსავალი - პანდემიის პირობებში ნაპოვნი გამოსავალი (ფოტო/აუდიო)

13:14 / 30.12.2020

პანდემიამ უამრავი ადამიანის ცხოვრება შეცვალა აფხაზეთში. 2020 წლის მარტში ფსოუზე საზღვრის ჩაკეტვამ კიდევ უფრო გაართულა სიტუაცია. დაწესებული შეზღუდვების გამო, დასაქმებული მოქალაქეების დიდი ნაწილი სამუშაოსა და შემოსავლის გარეშე დარჩა. მათ შორის აღმოჩნდნენ, ქორეოგრაფი ოლგა დენისოვა და მისი დედა, მარინა, რომელიც ტურისტულ სააგენტოში მუშაობდა. დედა - შვილმა, გამოსავლის ძიებაში, დიდი ხნის ოცნება აიხდინა და სულ რაღაც ერთ თვეში, ნატურალური კოსმეტიკის მაღაზიაც გახსნა.

"საქმე იმაშია, რომ ნატურალური კოსმეტიკის მოყვარულები პროდუქციას ინტერნეტ - საიტების საშუალებით იწერდნენ, ეს მოსახერხებელი იყო, რადგან მიტანის სერვისი საკმაოდ გამართულად ფუნქციონირებდა. მაგრამ საზღვრის დაკეტვის შემდეგ, პრაქტიკულად ყველას, ვინც ამანათების გადაზიდვით იყო დაკავებული, ფსოუს საკონტროლო - საგუშაგო პუნქტის გადაკვეთის უფლება ჩამოერთვა, მათ კი ვინც ნებართვის მოპოვება შეძლო, გადასახადი გაუორმაგეს. ამის შემდეგ, პოპულარული და აფხაზეთისთვის დეფიციტური საქონლის შეძენა პრობლემად იქცა", - ყვება ოლგა.

1059fm · ოლგა დენისოვა

ის განმარტავს, რომ აფხაზეთის მცხოვრებთათვის მსგავსი პროდუქციის შეძენა საკმაოდ რთულია. გამოწერილი ამანათი ადლერამდე მოდის, სადაც უნდა ჩახვიდე მის წამოსაღებად. მათი მაღაზიის საშუალებით კი ნატურალური კოსმეტიკის მოყვარულებს, უპრობლემოდ შეუძლიათ სასურველი ნივთის მიღება.

პატარა საოჯახო ბიზნესმა გაამართლა, დედა- შვილმა შემოსავლის ალტერნატიული წყაროც მიიღო და კმაყოფილი მომხმარებელიც, თუმცა, როგორც ამბობენ, რომ არა პანდემია, ალბათ ეს მაღაზიაც არ იქნებოდა.

პანდემიის პერიოდში უმუშევრად დარჩა კამა კაკალიაც. ის სოხუმში ბუღალტრად მუშაობდა. თითქმის მთელი კარანტინი, რომელიც ზაფხულსა და შემოდგომას დაემთხვა, სოფელში გაატარა. მთელი ეს დრო ბოსტნისა და ხეხილის მოვლას დაუთმო.

აღებული მოსავლისგან კი ზამთრის მარაგი დაამზადა - თითქმის 1 ტონამდე ხილისგან - კომპოტები და მურაბები, ხოლო ბოსტნეულისგან მწნილი და საწებლები. წელს ხურმის მოსავალმაც გაამართლა, კამამ თავად დაკრიფა ხილი და ფსოუს საგუშაგოსთან ჩააბარა ბითუმად.

"ჯამში 178 კილოგრამი გვქონდა, კიდევ 3% ჩამოაჭრეს, როგორც გვითხრეს, მათ ასეთი პრაქტიკა აქვთ სამი პროცენტი იქვითება წაგების, მაგალითად, თუ დალპა ხილი ან რამე... დანარჩენში, 40 რუბლი გადამიხადეს", - ამბობს კამა.

1059fm · კამა კაკალია
გამომდინარე იქიდან, რომ 40 რუბლი, ეს კი 1 დოლარზე ნაკლებია, არც თუ ისე მაღალი ფასია, კამამ დარჩენილი ხურმა გააშრო და სოხუმის ბაზარზე გაიტანა ჩასაბარებლად 150 რუბლად, რაც დაახლოებით, ორ-ნახევარ დოლარს შეადგენს.

ასე უმუშევრად დარჩენილმა ქალმა, საკუთარ მეურნეობაში მოწეული მოსავლის რეალიზაციით შეძლო კრიზისულ სიტუაციაში თავის გატანაც და მოგებაც მიღებაც.

კორონავირუსის პანდემიის გამო, რესპუბლიკაში მოქმედებს შეზღუდვები, დაკეტილია სავაჭრო ობიექტები, სურსათის მაღაზიების და აფთიაქების გარდა, არ მუშაობენ სპორტული და გასართობი დაწესებულებები და შეწყვეტილია სასწავლო პროცესი. აკრძალულია ხალხმრავალი შეკრებები. მთავრობის ბოლო განკარგულებით, რეგულაციები 12 იანვრამდეა გაგრძელებული.

მასალა მომზადებულია გადაცემა "Точки соприкосновения" - ს მიხედვით, რომელიც გადის რადიო "ათინათის" ეთერში. პროექტი ხორციელდება აფხაზ პარტნიორებთან თანამშრომლობით. მასალა შესაძლოა შეიცავდეს ტერმინებს, რომლებსაც აფხაზეთის დე ფაქტო რესპუბლიკაში იყენებენ.