აფხაზეთში 15 თებერვლიდან შეზღუდვების ნაწილობრივ შემსუბუქება დაიწყო. ამ ეტაპზე, ეპიდვითარებიდან გამომდინარე, ხელისუფლებამ საბავშვო ბაღების, სკოლების და კულტურის დაწესებულებების გახსნა გადაწყვიტა, თუმცა, საკლასო ოთახებში სასწავლო პროცესი მხოლოდ დაწყებითი კლასებითვის განახლდება, ისიც, იმ პირობით, რომ კლასში მხოლოდ 20 მოსწავლე იქნება. "ამ ნორმების შესრულებას ჩვენ მკაცრად გავაკონტროლებთ, სანიტარული სამსახურის რეკომენდაციების დაცვაზე მთელი პასუხისმგებლობა კი ორგანიზაციის ხელმძღვანელს და განათლების რაიონულ განყოფილებას ეკისრებათ", - განაცხადა განათლების მინისტრმა ინალ გაბლიამ.

მისივე თქმით, იმ შემთხვევაში, თუ მომდევნო დღეებში ინფიცირების შემთხვევები არ გაიზრდება, 22 თებერვლიდან, საკლასო ოთახებში, უფროსი კლასის მოსწავლეებიც დაბრუნდებიან.  

გარდა ამისა, ქალაქის მრავალრიცხოვანი სკოლებისთვის, ეპიდემიოლოგების რეკომენდაციების გათვალისწინებით, ახალი სასწავლო გეგმა შეიმუშავეს. "ორშაბათს, სამშაბათს და ოთხშაბათს, საკლასო ოთახებში გაკვეთილებს V-ХI კლასის, ხოლო დანარჩენ დღეებში, შაბათის ჩათვლით, I – IV კლასის მოსწავლეები დაესწრებიან. მრავალრიცხოვანი სკოლები გადავლენ მოდელზე "სამი სამზე", რისთვისაც სასწავლო პროგრამაში ცვლილებები შევიდა, შევამცირეთ საერთო სასწავლო გეგმით გათვალისწინებული საათები, ასევე ცვლილებები შევიდა თემატურ გეგმაში", - ამბობს სოხუმის ადმინისტრაციის განათლების განყოფილების ხელმძღვანელი ასტანდა ტარკილი.   

მშობლების ნაწილი მზადაა ხელი შეუწყოს სასწავლო დაწესებულებებს ჯანდაცვის სამინისტროს რეკომენდაციების დაცვაში. "ჩვენ უშუალოდ მივადევნებთ თვალს წესრიგის დაცვას, იმას, რომ ჩვენთან სკოლებში  არეულობა არ შეიქნას, აუცილებლად დავაკვირდებით,  რა მდგომარეობაში იქნება ჩვენი კლასები, როგორ იცავენ ნორმებს, და ამაში აქტიურ მონაწილეობას მივიღებთ, მე ვიყავი სკორიკთან, როგორც კომიტეტის ერთ -ერთი წევრი, და ჩვენ გვაქვს მისგან მითითებები, და კი არ მოვითხოვთ, პირიქით, მზად ვართ  ხელი შევუწყოთ სკოლას იმაში, რომ ყველა ეს მოთხოვნა შესრულდეს", - თქვა საერთო-ეროვნული მშობელთა კომიტეტის წევრმა ანტიცა კვიცინიამ.

ჯანდაცვის მინისტრი თამაზ ცახნაკია მიიჩნევს, რომ აუცილებელია ახალი ექსპრეს - ტესტების შეძენა, სქრინინგ- კვლევების ჩასატარებლად. ეს მათ საშუალებას მისცემს, უკეთ შეაფასონ სიტუაცია და გააკონტროლონ ინფიცირების დონე მოსწავლეებსა და მასწავლებლებში. "იმ ღონისძიებების ფარგლებში, რომლის შეთავაზებასაც ვგეგმავთ, ახალი განკარგულებით, ორკვირიან სქრინინგს ვგულისხმობ, როგორც ბავშვებში, ასევე მასწავლებლებში, ამით საშუალება მოგვეცემა უფრო გულმოდგინედ ვადევნოთ თვალი პროცესს და გავარკვიოთ, რამდენად შეიცვლება მდგომარეობა ამ პერიოდის განმავლობაში", - თქვა თამაზ ცახნაკიამ.

კულტურის იმ დაწესებულებებს შორის, რომლებიც მზად არიან, ყველა რეკომენდაციის დაცვით მუშაობა განაახლონ, არის სოხუმის რუსული დრამატული თეატრი.  მისმა დირექტორმა, ირაკლი ხინთბამ, არა ერთხელ განაცხადა მანამდე თეატრის გახსნის აუცილებლობის შესახებ.
აფხაზეთში შეზღუდვების ნაწილობრივი შემსუბუქება კვების ობიექტებსაც შეეხება - კაფე - ბარები და რესტორნები სტუმრების მიღებას მხოლოდ ღია სივრცეებში შეძლებენ, სანიტარული ნორმების დაცვით.

კორონავირუსის გამო დაწესებული სხვა შეზღუდვები აფხაზეთში 10 მარტამდე გახანგრძლივდა. პანდემიის გამო, ხელისუფლებამ დამატებითი შეზღუდვები 15 ოქტომბერს დააწესა და მას შემდეგ რამდენჯერმე გაახანგრძლივა.

მასალა მომზადებულია გადაცემა "Точки соприкосновения" - ს მიხედვით, რომელიც გადის რადიო "ათინათის" ეთერში. პროექტი ხორციელდება აფხაზ პარტნიორებთან თანამშრომლობით. მასალა შესაძლოა შეიცავდეს ტერმინებს, რომლებსაც აფხაზეთის დე ფაქტო რესპუბლიკაში იყენებენ.