ზუგდიდის №15 საბავშვო ბაღში აუტიზმის სპექტრის აშლილობის მქონე აღსაზრდელებისთვის ინტეგრირებული ჯგუფი გაიხსნა. ის საქართველოს მასშტაბით, "ჩეხეთის რესპუბლიკის კარიტასის" მიერ განხორციელებული პროექტის ფარგლებში, რიგით მეორეა. პირველი მსგავსი სპეციალური ჯგუფი თბილისში გაიხსნა.

ჯგუფი აუტისტური სპექტრის აშლილობის მქონე 8 აღსაზრდელზეა გათვლილი, ამ ეტაპზე ის 4 ბავშვს აერთიანებს. გარდა ამისა, პროექტის ფარგლებში, მასწავლებლებმა სპეციალური ტრენინგები გაიარეს და შესაბამისი კვალიფიკაცია მიიღეს. აუტისტური სპექტრის მქონე ბავშვებთან სწორედ ისინი იმუშავებენ. ინტეგრირებული ჯგუფი ზუგდიდის №15 საბავშვო ბაღში 1 ნოემბრიდან დაიწყებს ფუნქციონირებას.

„აუტიზმის სპექტრის მქონე ბავშვები იქნებიან ამ ოთახში, თუმცა ეს იმას არ ნიშნავს, რომ სხვა აღსაზრდელებთან არ ექნებათ ურთიერთობა, პირიქით, ისინი ინტეგრირებულნი იქნებიან ბაღის სხვა აღსაზრდელებთან“, - თქვა პროექტის მენეჯერმა რუსუდან ჩხუბიაშვილმა.



ზუგდიდის სკოლამდელ დაწესებულებათა სააღმზრდელო ცენტრის ხელმძვღანელის ელისო ყალიჩავას თქმით, ინფორმაცია სპეცჯგუფის შესახებ ზუგდიდში უკვე არსებობს და ჯგუფი მზად არის ბავშვების მისაღებად. 

ღონისძიებას ადგილობრივი თვითმმართველობის, ჩეხეთის საელჩოსა და უშუალოდ პროექტის წარმომადგენლები დაესწრნენ.

პროექტს "საქართველოში აუტიზმის სპექტრის დარღვევების მქონე ბავშვებისა და მოზარდებისათვის სერვისების განვითარების ხელშეწყობა" ჩეხეთის რესპუბლიკის კარიტასი, საქართველოში ჩეხეთის განვითარების სააგენტოს მხარდაჭერით, ჩეხეთის განვითარების სფეროში თანამშრომლობის პროგრამის ფარგლებში ახორციელებს.