ზუგდიდის მერიისგან საახალწლო საჩუქრებს საბავშვო ბაღების აღსაზრდელები 27, 28 და 29 დეკემბერს მიიღებენ. მერიის მიერ გავრცელებული ინფორმაციის თანახმად, დასკვნითი საახალწლო ღონისძიება დარჩელის საბავშვო ბაღში 29 დეკემბერს ჩატარდება.

„სკოლამდელი დაწესებულების აღსაზრდელებს საჩუქრებს მერი და მისი მოადგილე გადასცემენ”, - აღნიშნულია განცხადებაში.

მერიაში ასევენ განმარტავენ, რომ ბავშვებისთვის საახალწლო საჩუქრების გადაცემის დაგვიანება ახალი მუნიციპალიტეტის შექმნით არის განპირობებული.



ააიპ თვითმმართველ თემის ზუგდიდის მუნიციპალიტეტის სკოლამდელი სააღმზრდელო დაწესებულებათა ცენტრის მიერ გამოცხადებული ტენდერი, რომელიც საბავშვო ბაღების აღსაზრდელებისთვის საახალწლო სასაჩუქრე პაკეტების დარიგებას გულისხმობდა, არ შედგა. ცენტრის ხელმძღვანელი ცისანა თოლორაია მაშინ აცხადებდა, რომ ბავშვებს საჩუქრად ტკბილეულს ყოველდღიური ულუფის წილიდან დაურიგებენ. რადიო "ათინათის" კითხვაზე, აქვთ თუ არა ბაღის მოსწავლეების მშობლებს მითითება თანხის შეგროვებასთან დაკავშირებით, თოლორაიამ გვიპასუხა, რომ მსგავსი რამე ბაღების ცენტრიდან არ ყოფილა.

აღნიშნულ საკითხს ხმაური მოყვა ზუგდიდის მუნიციპალიტეტის საკრებულოს სხდომაზე, სადაც ფრაქცია ენმ-ის თავმჯდომარის ანი წითლიძის კითხვებს ქალაქის მერმა ლაშა გოგიამ უპასუხა. წითლიძემ მერი არშემდგარი ტენდერის გამო გააკრიტიკა, რაზედაც საპასუხოდ მან წითლიძეს უზრდელი უწოდა და დასძინა, რომ მამაკაცი რომ ყოფილიყო, შეაგინებდა.

მოგვიანებით გოგიამ განმარტა, რომ ბავშვები საჩუქრებს საახალწლო პერიოდში მიიღებდნენ. 

ამავე თემაზე:

ლაშა გოგია წითლიძეს: მამაკაცი რომ იყო, შეგაგინებდი (ვიდეო)

მერი: ბავშვები საჩუქრებს საახალწლო პერიოდში მიიღებენ

ენმ ზუგდიდის მერს საკრებულოს სხდომაზე იბარებს (ვიდეო)

საბავშვო ბაღების აღსაზრდელები საახალწლო საჩუქრებს ყოველდღიური ულუფიდან მიიღებენ