ზუგდიდში, USAID Zrda პროექტის ხელმძღვანელმა ბრაიან კინგმა და საქართველოს ტურიზმის ეროვნული ადმინისტრაციის ხელმძღვანელმა გიორგი ჩოგოვაძემ, ადგილობრივი ხელისუფლების წარმომადგენლებთან ერთად, სამეგრელო-ზემო სვანეთში დანიშნულების ადგილის მართვის ორგანიზაცია (DMO) დააფუძნეს. DMO-ს მიზანია სამეგრელო-ზემო სვანეთის რეგიონის ტურიზმის განვითარების მოდელის შექმნის ხელშეწყობა და მისი პოპულარიზაცია.

„მიზანი არის რეგიონში კერძო და სახელმწიფო მოთამაშეების გაერთიანება, რომ ერთობლივად მოიზიდონ ტურისტები, შესთავაზონ ხარისხიანი მომსახურება და ასე შემედგ. მუნიციპალიტეტები ცალ-ცალკე ვერ ახერხებენ ამ ყველაფერთან გამკლავებას და ერთად შეძლებენ ახალი და ხარისხიანი მომსახურების გაწევას. ჩვენ გვერდში ვუდგავართ მათ“, - აღნიშნა პროექტის მენეჯერმა დავით წიკლაურმა.



სამეგრელო-ზემო სვანეთის DMO გაითვალისწინებს რეგიონის, როგორც ტურისტული დანიშნულების ადგილის შესახებ უკვე არსებულ კვლევებს და ასევე თავს მოუყრის სხვადასხვა დონორებისა და ტურიზმის სფეროში მომუშავე ორგანიზაციების მიერ შემუშავებულ სტრატეგიულ დოკუმენტებს. გარდა ამისა, DMO ჩაატარებს რეგიონში ყველა ტურისტული ღირსშესანიშნაობის არსებული მდგომარეობის ანალიზს, მოიძიებს და დანერგავს ახალ მიდგომებს, რაც ხელს შეუწყობს რეგიონის ეკონომიკურ ზრდას და დასაქმებას. 



„დღეს მეტად მნიშვნელოვანი ორგანიზაციის შექმნას ჩაეყარა საფუძველი. ტურიზმის განვითარება ეკონომიკისთვის და მოსახლეობისთვის მნიშვნელოვანია. რეგიონში გვაქვს ღირსშესანიშნავი ადგილები და განვითარება გვჭირდებოდა ამ მიმართულებით, რომ ერთ-ერთ მიმზიდველ ტურისტულ ზონად ვაქციოთ სამეგრელო-ზემო სვანეთი“, - თქვა გუბერნატორის მოადგილემ ნინო ვიბლიანმა.



შეხვედრას, რომელიც ტექნოპარკში ჩატარდა, მუნიციპალიტეტების მერებთან ერთად ადგილობრივი მეწარმეები დაესწრნენ. მათი შეფასებით, მსგავსი ორგანიზაციის დაფუძნება მნიშვნელოვანია ტურიზმის ხელშეწყობისა და ქვეყნის ეკონომიკური განვითარებისთვის. შეკრებილებმა ორგანიზაციის დაფუძნების აქტს ხელი სიმბოლურად მოაწერეს.



„ეს იქნება პლატფრომა, სადაც გაიცვლება ინფორმაციები, დამოკიდებულებები და ასე შემდეგ. გამოიკვეთება გამოწვევები და გადაჭრის გზებისთვის შესაბამისი ზომებიც მიიღება“, - თქვა მეღვინემ მარტვილიდან ქეთო ნინიძემ.

რეგიონში ტურიზმის განვითარების მხარდასაჭერად, Zrda ხელს უწყობს ახალი ტურისტული პროდუქტის შემუშავებას, ახალი ტურისტული ობიექტების და ღირშესანიშნაობების პოპულარიზაციასა და ტურიზმის სექტორში ჩართული მხარეების ხარისხის საერთაშორისო სტანდარტებთან შესაბამისობის გაუმჯობესებას კომპლექსური მიდგომის გამოყენებით. ახალი ტურისტული პროდუქტების პოპულარიზაციის მიზნით, პროექტმა ორგანიზება გაუწია საინფორმაციო და მედია ტურებს, სემინარებს და ტრენინგებს, რის შედეგადაც გაიზარდა რეგიონებში არსებული ტურისტული ობიექტების ცნობადობა და ვიზიტორ-დამსვენებლის მაჩვენებელი.