ზუგდიდის ცენტრალურ სუპერმარკეტში დასაქმებული მოვაჭრეები პროდუქტებით გარევაჭრობის აკრძალვას მოითხოვენ. ისინი ჩივიან, რომ მათთან მომხმარებელი, ფაქტობრივად აღარ შემოდის, რადგან სასურველ პროდუქტებს ბაზარში შესვლამდე გარემოვაჭრეებისგან ყიდულობენ.

"ბატონ მამუკასთან გვაქვს თხოვნა, პროდუქტით გარევაჭრობა აიკრძალოს. არ გვაინტერესებს ტანსაცმელი, ყველას უკიდურესი მდგომარეობა აქვს და არ ვეხებით. ადგილები გვაქვს, 5-ჯერ გავაკეთეთ მთავრობის დაკვეთით უბნები, ყველა ცარიელი დარჩა. შეგვყავდა ხალხი, ფულს არ ვახდევინებდით წლობით, ოღონდ მთავრობის გვერდით ვყოფილიყავით. იმავეს ვაკეთებთ ახლაც, მაგრამ არავინ არაა ჩვენ გვერდით. არანაირი იმედი არ გვაქვს. დღეს მოვიდა მერი, ჩვენი თხოვნა თუ შესრულდება, მზად ვართ გვერდით დავუდგეთ, თუ არა და ჩვენს ამბავს მივხედავთ", - ამბობს ბაზრის ადმინისტრაციის წარმომადგენელი ნონა ნიჟარაძე.

გარემოვაჭრეებს დღეს ზუგდიდის მერი მოადგილესთან ერთად შეხვდა. მამუკა წოწერია ამბობს, რომ ყველა მხარესთან კონსულტაციებს გამართავენ, რათა ვაჭრობას ორგანიზებული სახე მიეცეს.

"ზუგდიდის მუნიციპალიტეტში არის რეგულაციები, რომელიც მიღებულია საკრებულოს მიერ გარევაჭრობასთან დაკავშირებით. აქ არის მთავარი დავიცვათ ბალანსი ყველა მხარის ინტერესების გათვალისწინებით, როგორც ცენტრალური სუპერმარკეტის, ასევე გარემოვაჭრეების. აქ მთავარია, ჩვენ შევქმნათ ალტერნატივა, ბაზრის ტერიტორიაზე. გავმართავთ კონსულტაციებს, როგორც ბაზრის ადმინისტრაციასთან, ისე გარემოვაჭრეებთან, შევთავაზებთ მათ გადაინაცვლონ იმ ტერიტორიაზე, სადაც ვაჭრობა უფრო მეტად ორგანიზებული იქნება, მოქცეული იქნება სანიტარულ-ჰიგიენურ ნორმებში და რა თქმა უნდა, ეს ყველამ უნდა დავიცვათ. ჩვენ გავითვალისწინეთ ბევრი ფაქტორი, სოციალური პრობლემები მოვაჭრეების და ასე შემდეგ, მაგრამ, მე ვფიქრობ, რომ გარკვეული საფუძველი აქვს დღეს გამოსული ადამიანების პროტესტს, იმის გამო, რომ ისინი იხდიან გადასახადებს, საიჯარო მოსაკრებელს, ექვემდებარებიან რეგულაციებს, მაგრამ გარკვეული კატეგორია, რომელიც გარეთ ვაჭრობს, პერიმეტრზე, ამ გადასახადისგან თავის არიდების პოზიციაშია, აქედან გამომდინარე, ჩვენ ვცდილობთ ყველა მოექცეს ერთ სიტუაციაში", - აღნიშნა წოწერიამ.

ადგილზე მობილიზებული იყო დიდი რაოდენობით პოლიცია.

ზუგდიდში გარევაჭრობის პრობლემა მრავალი წელია დგას. ბაზრის გარეტერიტორიაზე მოვაჭრეებსა და ზუგდიდის მერიას შორის ამ საკითხზე უთანხმოება დღემდე გრძელდება. ადგილობრივი ხელისუფლება მათ ალტერნატიულ ფართს, ბაზრის შიდატერიტორიას სთავაზობს, თუმცა ამ წინადადებას მოვაჭრეები არ თანხმდებიან, რადგან, როგორც ისინი ამბობენ, იქ მომხმარებელი არ შედის.