ზუგდიდის რაიონულ სასამართლოში ბადრი ესებუას საქმის განხილვა გრძელდება. დღევანდელ პროცესზე მხოლოდ ერთი მოწმე გამოიკითხა. ბრალდების მხარე იმ ნივთიერი მტკიცებულებების გამოკვლევას ითხოვდა, რომელიც საქმეს ერთვის, თუმცა დაცვის მხარემ მათი უმეტესობა უდავოდ ცნო.  გარდა სუნის ნიმუშისა და იარაღის მასრებისა, ამ მტკიცებულებებს მხარეები მომდევნო პროცესზე გამოიკვლევენ.


„დღეს ბრალდების მხარემ გააგრძელა მტკიცებულებათა გამოკვლევა. გამოვკითხეთ ერთი დაზარალებული. ასევე, ჩვენ ვგეგმავდით ნივთიერი მტკიცებულებების გამოკვლევას, რომელიც საკმაოდ მრავალრიცხოვანია, თუმცა დაცვის მხარემ მტკიცებულებათა უმრავლესობა უდავოდ ცნო, მოითხოვა მხოლოდ სუნის ნიმუშებისა და მასრების გამოკვლევა და ამ მტკიცებულებებს ბრალდების მხარე გამოიკვლევს შემდეგ სასამართლო სხდომაზე,"- განაცხადა მირანდა წერეთელმა.

ბადრი ესებუას უფლებადამცველის სოსო ჯანაშიას განცხადებით, მტკიცებულების უმეტესობა, რომელიც უდავოდ ჩაითვალა, ესებუას სახლის ჩხრეკისას არის ამოღებული და მათ საქმესთან პირდაპირი კავშირი არ აქვთ. გარდა ამისა,  დღევანდელ სხდომაზე ბრალდების მხარე ითხოვდა იმ მოწმეების გამოკითხვას, რომლებიც საქართველოში არ იმყოფებიან. დაცვის მხარემ მოსამართლეს მიმართა შუამდგომლობით, რომ აღნიშნული პირები, შესაძლოა, დაბრუნდნენ ქვეყანაში სასამართლო პროცესის დასრულებამდე, ამიტომ მოითხოვა მათი გამოკითხვა შემდგომ სხდომებზე. სასამართლომ აღნიშნული შუამდგომლობა დასაშვებად ცნო.

,,დღევანდელ პროცესზე გამოიკითხა ერთი მოწმე, რომელიც მოცემულ საქმეზე იყო დაზარალებული. მას თვალით არ უნახავს მძარცველი, მაგრამ განაცხადა, რომ მან გაიგო ეს იყო ბადრი ესებუა, თუმცა როგორც შემდეგ გაირკვა, ეს მასმედიის საშუალებით ორი დღის შემდეგ გაუგია. რაც შეეხება კიდევ ერთ საკითხს, რომელიც დღევანდელ პროცესზე გაირკვა, ბრალდების მხარეს უნდოდა ნივთიერი მტკიცებულებების გამოკვლევა , თუმცა ამ ნივთიერი მტკიცებულებებიდან დაცვის მხარის შუამდგომლობით გამოკვლეული იქნება მხოლოდ ბალისტიკურ ექსპერტიზაზე გაგზავნილი მასრები და ასევე, ოდოროლოგიურ ექსპერტიზაზე გაგზავნილი სუნის ნიმუშები. რაც შეეხება სხვა კონკრეტულ ნივთიერ მტკიცებულებებს, ეს იყო სხვადასხვა ნივთი ამოღებული ბადრი ესებუას საცხოვრებელი სახლიდან, საყოფაცხოვრებო ნივთები, რომლებსაც არანაირი შემხებლობა ამ საქმესთან დაკავშირებით არ ჰქონდა, აქედან გამომდინარე, ჩვენ ეს მტკიცებულებები ჩავთვალეთ არაარსებითად და მივიღეთ როგორც პრედუქციული ძალის მქონე მტკიცებულებები ,"- განაცხადა იოსებ ჯანაშიამ.

ესებუა ზუგდიდთან ახლოს, სოფელ ჯიხაშკარში 8 თებერვალს აიყვანეს.  

2020 წლის 21 ოქტომბერს, დაახლოებით, 14:15 წთ-ზე შეიარაღებული და სამხედრო ფორმაში გამოწყობილი მამაკაცი ზუგდიდში, გამსახურდიას ქუჩაზე მდებარე ბანკის ფილიალში შეიჭრა და მძევლები აიყვანა. ის ნახევარ მილიონს დოლარს ითხოვდა. სპეცოპერაცია მძევლების გასათავისუფლებლად, თითქმის, 7 საათის განმავლობაში მიმდინარეობდა. მასთან მოლაპარაკებებს სამეგრელო-ზემო სვანეთის სამხარეო პოლიციის უფროსი ავთანდილ გალდავა აწარმოებდა. საბოლოოდ, თავდამსხმელმა გალდავასთან და სამ მძევალთან ერთად შენობა დატოვა და პოლიციის პიკაპის ტიპის ავტომანქანით გაურკვეველი მიმართულებით წავიდა. მოგვიანებით, როგორც მძევლები ჰყვებიან, მამაკაცმა ისინი ჩხოროწყუს სოფელ კირცხის ტყეში დატოვა და თავად ფულთან ერთად გაუჩინარდა.

გამოძიება საქართველოს სისხლის სამართლის კოდექსის 236-ე, 323-ე და 329-ე მუხლებით მიმდინარეობს, რაც ტერორისტულ აქტს, მძევლად ხელში ჩაგდებას ტერორისტული მიზნით და ცეცხლსასროლი იარაღის უკანონოდ შეძენა-შენახვა-ტარებას გულისხმობს.


ამავე თემაზე: 

იარაღისა და საბრძოლო მასალის უკანონო ფლობისთვის ბადრი ესებუას 4 წელი მიესაჯა

პოლიციელი: „ბადრი ესებუას ვიცნობ, თავდასხმის დროს ხმით ვიცანი“

მოწმე ბადრი ესებუაზე: „ჩემს თვალში ცხოველი ზის აქ“

ბადრი ესებუა ავთო გალდავას - მინდა მოგილოცოთ ჩემი დაკავება