აფხაზეთის საოკუპაციო ხაზთან მოკლული გიგა ოთხოზორიას ცოლი, ნინო მატკავა, სოციალურ ქსელში პოსტს აქვეყნებს, რითაც თბილისში და საქართველოში მიმდინარე მოვლენებს და „აგენტის“ კანონის საწინააღმდეგო პროტესტს ეხმაურება.

„ჩემი ბავშვობა - დარბეული აქციები, მწარე 9 აპრილი. ჩემი სტუდენტობა - კვლავ აქციები, სააკაშვილის მტკივნეული 7 ნოემბერი, ახლა უკვე ჩემი შვილები და ისევ აქციები, იგივე მიდგომა. არ მინდოდა წარსული ოდესმე მენახა. ამიტომაც გააზრებულად ვთქვი უარი წინა ხელისუფლებაზე. არ მინდა ვნახო ჩემი შვილების წინააღმდეგ წასული მოძალადე პოლიციელი. არ მინდა ახალგაზრდების სისხლით მიღებული კანონი, ჩემთვის რუსეთი ოჯახის დამაქცეველია, ოჯახიდან სამი წევრი მათ გამო საფლავში წევს'', - წერს ის.

30 აპრილს თბილისში, მრავალათასიანი საპროტესტო აქცია მიმდინარეობდა, „აგენტების“ კანონს მანიფესტანტები თბილისის სხვადასხვა წერტილში აპროტესტებდნენ.

ხელისუფლებამ აქციის დასაშლელად სპეცდანიშნულების რაზმები გამოიყვანა, არაერთხელ გამოიყენა ცრემლსადენი გაზი, წყლის ჭავლი და ფიზიკურად გაუსწორდა აქციის მონაწილეებს. ვრცელდება ინფორმაცია მოქალაქეების, მათ შორის, ზუგდიდელი აქტივისტის როსტომ ზარანდიას დაკავების შესახებ.

გიგა ოთხოზორია ე.წ. მესაზღვრემ რაშიდ კანჯი-ოღლიმ 2016 წლის 19 მაისს, დაახლოებით, 15:00 საათზე, ხურჩა-ნაბაკევის ე.წ საზღვართან, საქართველოს მიერ კონტროლირებად ტერიტორიაზე ცეცხლსასროლი იარაღიდან გასროლით მოკლა.

ზუგდიდის რაიონულმა სასამართლომ მკვლელობაში ბრალდებული რაშიდ კანჯი-ოღლი დამნაშავედ ცნო და მას 12 წლით თავისუფლების აღკვეთა დაუსწრებლად მიესაჯა. ქუთაისის სააპელაციო სასამართლოს გადაწყვეტილებით კი, მას სასჯელის ზომად 14 წლით თავისუფლების აღკვეთა განესაზღვრა.

2023 წლის დეკემბერში, ადამიანის უფლებათა ევროპულმა სასამართლომ გიგა ოთხოზორიას მკვლელობის საქმეზე რუსეთის ფედერაციას სიცოცხლის უფლების დარღვევა დაუდგინა და გიგა ოთხოზორიას ოჯახს არამატერიალური ზიანის სახით კომპენსაცია მიანიჭა.