დღეს, 4 მაისს ზუგდიდის მუნიციპალიტეტის მერიის წინ მორიგი აქცია სახელწოდებით "არა რუსულ კანონს" 17:30 საათზე გაიმართება.

აქციაზე შეკრებილი მოქალაქეები კიდევ ერთხელ გააპროტესტებენ რუსულ კანონს.

ორგანიზატორები მოუწოდებენ მოქალაქეებს, რომ უსამართლობის დროს დუმილი თანამონაწილეობის ტოლფასია და რუსული კანონის წინააღმდეგ აქციას შეუერთდნენ.

,,ძვირფასო მეგობრებო, უსამართლობის დროს დუმილი თანამონაწილეობის ტოლფასია. დღეს ჩვენი ქვეყანა დგას კრიტიკულ გზაჯვარედინზე, სადაც რუსეთის გავლენის მოსალოდნელი ჩრდილი საფრთხეს უქმნის ჩვენს გზას პროგრესისა და სუვერენიტეტისკენ. რუსული რეჟიმი აყვავდება განსხვავებული აზრის გაჩუმებით და ოფშორული ხარვეზების მეშვეობით რჩეულის გამდიდრებით, ხალხის საჭიროებებისა და მისწრაფებების უგულებელყოფით. თუ თქვენ, ისევე როგორც ჩვენ გჯერათ, რომ ევროინტეგრაცია არის საქართველოს მომავლის ქვაკუთხედი - გზა სოციალურ-ეკონომიკური კეთილდღეობის, უსაფრთხოებისა და ტერიტორიული მთლიანობისკენ - მაშინ თქვენი ყოფნა სასიცოცხლოდ მნიშვნელოვანია ჩვენს წინააღმდეგობაში. შემოგვიერთდით ზუგდიდის მერიასთან, 4 მაისს,17:30 საათზე. დადექით ჩვენთან ერთად. თქვენი ხმა და თქვენი ურყევი ერთგულება ცვლილებებისთვის უმნიშვნელოვანესია'', - აღნიშნულია სამოქალაქო სოლიდარობის ცენტრის მიერ გავრცელებულ განცხადებაში.

3 აპრილს "ქართული ოცნების" აღმასრულებელმა მდივანმა მამუკა მდინარაძემ თქვა, რომ მმართველი პარტია "უცხოური გავლენის გამჭვირვალობის შესახებ" კანონს მეორედ დააინიცირებდა. საქართველოს პარლამენტის ბიურომ კანონპროექტი 8 აპრილს დაარეგისტრირა.

საქართველოს პარლამენტმა, 83 ხმით, "უცხოური გავლენის გამჭვირვალობის შესახებ" კანონპროექტი პირველი მოსმენით 17 აპრილს, ხოლო მეორე მოსმენით, 1 მაისს მიიღო. კანონპროექტის განხილვა მრავალათასიანი აქციების ფონზე მიმდინარეობს, პროტესტები უკვე მესამე კვირაა უწყვეტად მიმდინარეობს თბილისსა და საქართველოს სხვა ქალაქებში, მათ შორის ზუგდიდში.

2023 წლის 7 მარტს პარლამენტმა პირველი მოსმენით მიიღო კანონი "უცხოური გავლენის აგენტების" შესახებ, რასაც საკანონმდებლო ორგანოს შენობასთან ათასობით მოქალაქის შეკრება მოყვა. აქციის დასაშლელად ძალოვნებმა გამოიყენეს წყლის ჭავლი, ცრემლმდენი გაზი და ე.წ. წიწაკის სპრეი. დაშავდა ათობით ადამიანი, 66 პირი კი დააკავეს. საპროტესტო აქცია სლოგანით "არა რუსულ კანონს" გაიმართა ზუგდიდშიც. 9 მარტს კი "ქართული ოცნების" პოლიტსაბჭოსა და "ხალხის ძალას" შორის კონსულტაციების შედეგად, აღნიშნული კანონპროექტის პარლამენტიდან გაწვევის გადაწყვეტილება მიიღეს, ხოლო 10 მარტს პარლამენტმა მეორე მოსმენით ჩააგდო დოკუმენტი.


ამავე თემაზე:

ზუგდიდში მერიის შენობის წინ "აგენტების კანონის" საწინააღმდეგო აქცია გაიმართა (ფოტო)

ქვარაია, თოლორაია, ბერაია, ხახუბია - "აგენტების კანონის" მხარდამჭერები სამეგრელოდან

პირველი მოსმენით "აგენტების კანონი" მიღებულია

"აგენტების" კანონი მეორე მოსმენით მიღებულია

რადიო "ათინათი" არ გეგმავს "უცხოური გავლენის აგენტად" დარეგისტრირებას - განცხადება