ბალდის კანიონის მშენებლობის მოწინააღმდეგეები 29 ივნისს, 16:00 საათზე, მარტვილის მერიასთან აქციას აანონსებენ. ამის შესახებ ინფორმაცია მათ საკუთარ ფეისბუქ გვერდზე გამოაქვეყნეს.

"ერთად დგომას და ერთმანეთის მხარდაჭერას აქვს ის ძალა, რასაც შეუძლია ჩვენი სიცოცხლის, ბუნების და მომავლის გადარჩენა - მოსპობის, განადგურებისა და დამახინჯებისგან. შეგახსენებთ, რომ კანიონზე უკანონო მშენებლობას შეეწირა შველი", წერენ ორგანიზატორები.

ისინი მოქალაქეებს ადგილზე ჩასვლისკენ მოუწოდებენ და აღნიშნავენ, რომ იბრძვიან არამხოლოდ ბალდელების, არამედ ყველას სასიკეთოდ.

ინფორმაციისთვის, თვეებია, ადგილობრივი მოსახლეობის ნაწილი კომპანია "კანიონ 350"-ს სამუშაოების შეჩერებას ითხოვს და ტერიტორიის გასხვისებას უკანონოს უწოდებს.

სახელმწიფო უწყებაში კი განმარტავენ, რომ ყველა სახის სამუშაო კანონის სრული დაცვით მიმდინარეობს.

კომპანიამ ორი წლის განმავლობაში 3 მილიონ ლარამდე ინვესტიცია უნდა განახორციელოს, მომდევნო 3 წლის ვადაში კი ბუნების ძეგლზე მოაწყოს ეკოტურისტული ინფრასტრუქტურა - ვიზიტორთა ცენტრი, როლერი ატრაქცია, კიდული ბილიკი და საფეხმავლო ბილიკი.

გარდა ამისა, შეგახსენებთ, 11 ივნისს, გვიან ღამით მოძრაობის წევრებს სანადირო თოფითა და დანებით თავს დაესხნენ და მათი ორი წევრი დაჭრეს. აღნიშნულ საქმეზე სამართალდამცავებმა ძმები - 1979 წელს დაბადებული გ.ხ. განზრახ მკვლელობის მცდელობის, ხოლო 1983 წელს დაბადებული გ.ხ. მუქარის ბრალდებით დააკავეს.


ამავე თემაზე:

პოლიციამ ბალდის კანიონის მშენებლობის ერთ-ერთი მოწინააღმდეგე დააკავა

ბალდის კანიონის მშენებლობის მოწინააღმდეგეებს ცივი იარაღით თავს დაესხნენ, დაკავებულია ორი პირი

ბრაკონიერობა ბალდის კანიონზე - მოქალაქეს ტომარაში შვლის დანაწევრებული ხორცი ედო

ბალდის კანიონის ტერიტორიაზე ექსპერტთა ჯგუფი არ შეუშვეს - დაცული ტერიტორიების სააგენტო

ბალდის კანიონის ბიომრავალფეროვნებაზე ზემოქმედება შეფასდება - დაცული ტერიტორიების სააგენტო

ბალდის კანიონის შესანარჩუნებლად ადგილობრივთა პროტესტი გრძელდება

ბალდის კანიონზე მშენებლობის შეჩერების მოთხოვნით მორიგი აქცია გაიმართა

ბალდის კანიონის იჯარის წესით გასხვისების საწინააღმდეგო სარჩელს სასამართლოში შეიტანენ