3 ივლისს, წალენჯიხის მუნიციპალიტეტში ძლიერმა ქარმა, უხვმა ნალექმა, და ელჭექმა მოსახლეობის საკარმიდამო ნაკვეთებთან და საცხოვრებელ სახლებთან ერთად, დააზიანა მაცხოვრის ფერიცვალების ტაძარი. მეხი დაეცა მის გუმბათს. ამის შესახებ ინფორმაცია საკუთარ ფეისბუქ გვერდზე მუნიციპალიტეტის მერის მოადგილემ თამარ ბელქანიამ გაავრცელა.

"ნაკიფუს მხარეს, საითაც ტაძარი დგას, მოსახლეობა სერიოზულად დაზარალდა. სახლებს სახურავი ახადა და კედლის გარეშე დატოვა ერთი სახლი, მოსავალიც მთლიანად გაანადგურა. ამის პარალელურად, ქარბორბალამ და მეხის დაცემამ დააზიანა მაცხოვრის ფერიცვალების ტაძარი. დაზიანებულია გუმბათის საყრდენი ყელი, ის მარცხნივ არის გადახრილი და გაჩხირულია ორი დიდი ქვა. გარდა ამისა, ტაძრის კედლიდან ჩამოშლილია ფრესკებიც", - ეუბნება ბელქანია რადიო "ათინათს".

მისივე ცნობით, შემთხვევის შედეგად არავინ დაშავებულა, თუმცა როგორც რესპონდენტი ამბობს, მერიამ დაუყოვნებლივ შესთავაზა ეკლესიას დახმარება, მრევლისა და ტაძარში მომსახურეთა უსაფრთხოებასთან დაკავშირებული რისკების გამო.

"შესაძლებელია, ის ქვები ჩამოვარდეს და ფატალური შედეგიც დადგეს. უკვე შევატყობინეთ კულტურისა და ძეგლთა დაცვის სამინისტროს. მათ თქვეს, რომ ხელი არ უნდა ვახლოთ დაზიანებულ ნაწილს, რადგან ტაძარი იუნესკოს დაცვის ქვეშაა. რამდენიმე საათში ადგილზე ჩამოვა ექსპერტთა ჯგუფი, რომელიც დაათვალიერებს, შეაფასებს და მიიღებს გადაწყვეტილებას სარეაბილიტაციო სამუშაოების შესახებ", - განმარტავს ის.

შეგახსენებთ, წალენჯიხაში ძლიერმა ქარმა და სეტყვამ რამდენიმე სოფელი 3 ივლისს დააზარალა. სტიქიამ საცხოვრებელი სახლები და ეზოები დატბორა ნაკიფუში, მიქავასა და ლეჯოლოხეში.


ფოტო: თამარ ბელქანიას ფეისბუქ გვერდი


ამავე თემაზე:

წალენჯიხაში ძლიერმა ქარმა პრობლემები შექმნა