საერთაშორისო საარბიტრაჟო სასამართლოს მიერ მიღებული გადაწყვეტილებით, "ანაკლიის განვითარების კონსორციუმის" სარჩელი არ დაკმაყოფილდა. ამის შესახებ ინფორმაცია კომპანიამ საკუთარ ვებ გვერდზე გაავრცელა.

კომპანიის წარმომადგენლები აცხადებენ, რომ გადაწყვეტილება გულდასაწყვეტია. ისინი საარბიტრაჟო პროცესთან დაკავშირებულ დეტალებს არ განმარტავენ, რადგან მათი თქმით, ეს კონფიდენციალურია.

"ჩვენ კვლავაც გვჯერა, რომ საქართველოს მთავრობა მოქმედებდა არასწორად, საქართველოს მოქალაქეების ინტერესების საზიანოდ, როდესაც ცდილობდა ანაკლიის პორტის პროექტისთვის ზიანის მიყენებას, რამაც შედეგად გამოიწვია პორტის პროექტის თითქმის ათწლეულით დაყოვნება, ათასობით სამუშაო ადგილისა და შემოსავლების დაკარგვა საქართველოსთვის", - წერს კომპანია.

ინფორმაციისთვის, თავდაპირველად, ღრმაწყლოვანი პორტი "ანაკლიის განვითარების კონსორციუმს" უნდა აეშენებინა, პირველი გემები კი 2020 წლის ბოლოს უნდა მიეღო, თუმცა სახელმწიფომ მასთან საინვესტიციო კონტრაქტი დოკუმენტით გათვალისწინებული ვალდებულებების შეუსრულებლობის მიზეზით გაწყვიტა. კომპანიის წარმომადგენლები მას უარყოფდნენ და აცხადებდნენ, რომ მიღებული გადაწყვეტილება იყო უკანონო და მათი თქმით, პროექტის ჩაშლით საქართველომ დაკარგა 2,2 მილიარდი დოლარის ეკონომიკური ეფექტი. ამის შემდეგ, "ანაკლიის განვითარების კონსორციუმმა" საერთაშორისო საარბიტრაჟო სასამართლოში სარჩელი შეიტანა, რომელიც საქართველოს მთავრობის მიერ ხელშეკრულების შეწყვეტის უკანონობას და ანაკლიის პროექტში უკვე განხორციელებული ინვესტიციების ანაზღაურებას ეხებოდა.

2024 წლის სახელმწიფო ბიუჯეტის მიხედვით, ანაკლიის პორტის ინფრასტრუქტურისთვის 50 მლნ ლარია გამოყოფილი. 

ეკონომიკის მინისტრმა ლევან დავითაშვილმა 25 ივლისს თქვა, რომ ანაკლიის პროექტთან დაკავშირებით კერძო პარტნიორის შერჩევის ეტაპი 26 ივლისს დასრულდებოდა და მშენებელი კომპანიასაც სწორედ ამ დღეს გამოავლედნენ. 

ცნობისთვის, მინისტრის განმარტებით, პორტის პროექტის გამარჯვებულად ჩინური კონსორციუმი გამოცხადდებოდა, რადგან სამინისტრომ წინადადებები მხოლოდ მისგან მიიღო. პარტნიორის შერჩევის ეტაპი კი წარმატებით გაიარა შვეიცარიულ-ლუქსემბურგულმა კომპანიამაც.

აშშ-ის სახელმწიფო დეპარტამენტში განაცხადეს, რომ შერჩეული ჩინური კონსორციუმი ამერიკის მთავრობამ სამხედრო, სადაზვერვო-კვლევით საქმიანობაში, იარაღისა და სამხედრო აღჭურვილობის წარმოების განვითარებაში ამხილა. მათი განმარტებით, კონსორციუმს აქვს თაღლითობასა და კორუფციაში მონაწილეობის ისტორიაც.


ამავე თემაზე:

ჩინეთის ანაკლიაში შემოსვლისას რამდენად დაცული იქნება ქვეყნის უსაფრთხოება, ის ალიანსშია რუსეთთან - მამუკა ხაზარაძე

პორტი ,,ანაკლია’’ არის ერთ - ერთი მსხვილი პროექტი, რომელსაც ჩვენ განვახორციელებთ - ხაზარაძე

მამუკა ხაზარაძე: დავას სასამართლოში გავაგრძელებთ

“ანაკლიის საზღვაო ნავსადგურის“ სამშენებლო სამუშაოებისთვის საერთაშორისო ტენდერში წინადადებების მიღება დასრულდა

ანაკლიის პორტი გახდება ჩინეთ-საქართველოს ეკონომიკური და სავაჭრო თანამშრომლობის სიმბოლური პროექტი - ჩინეთის ელჩი

ანაკლიაში ჩინელების ამ დოზით შემოყვანა დანის ჩარტყმაა ამერიკელ, ევროპელ პარტნიორებთან ურთიერთობებში - პრეზიდენტი

ანაკლიის პროექტში პირველი ფაზის საინვესტიციო მოცულობა 600 მლნ დოლარია - პრემიერი