თბილისში, საპროტესტო აქციის დაშლისას დაშავებული ზუგდიდელი ალექსი თირქია მედიკამენტოზური ძილიდან გამოიყვანეს. ამის შესახებ სოციალურ ქსელში 22 წლის ახალგაზდას მამიდამ, ეკა თირქიამ დაწერა.

"სასიხარულო ამბავი გვაქვს...ალექსიმ, გაიღვიძა და რეაგირებს ყველაფერზე...რჩება რეანიმაციულ განყოფილებაში, სტაბილურად მძიმე, იგივე რისკებით..თუმცა ,ვიცი რომ ყველაფერი კარგად იქნება", - წერს ის.

ინგოროყვას კლინიკაში კი განაცხადეს, რომ ძილიდან გამოსვლის ეტაპი წარმატებით მიდის. მათი თქმით, უკვე მოხერხდა მასთან გარკვეული ტიპის კონტაქტის დამყარება და პაციენტი ასრულებს მარტივ მითითებებს, თუმცა, მისი მდგომარეობა საკმაოდ საყურადღებო და მძიმეა. 

"ამ ეტაპზე, მხედველობაზე არ არის საუბარი, თუ სიმძიმის მიხედვით დავალაგებთ მიღებულ ტრავმებს, აქ არის, პირველ რიგში, საუბარი თავის ტვინის თხემზე ჩატარებული პოსტოპერაციული პერიოდი, ძვლების იმპრესიული მოტეხილობა იყო – შუბლის ძვლების, შუბლის წილის გარკვეული ტიპის დაზიანებით. ასეთ შემთხვევაში თავის ტვინზე უფრო გახლავთ საუბარი, ვიდრე თვალზე. თვალის მთლიანობა დარღვეული არ იყო, თუმცა ამაზე უფრო დეტალურ ინფორმაციას მოგაწვდით მას შემდეგ, რაც ჩატარდება კიდევ ერთხელ ცნობილი ოფთალმოლოგების კონსულტაცია და კიდევ ერთხელ შეფასდება თვალის მდგომარეობა. მოგეხსენებათ, ძილის დროს შეუძლებელია ამის გაკეთება, უბრალოდ, ფიზიკურად შეიძლება გაისინჯოს, მხედველობის ფუნქცია შენახულია თუ არა. ბუნებრივია, ეს იქნება მას შემდეგ, რაც პაციენტი გამოიღვიძებს და თავის შეგრძნებებს თვითონ გადმოგვცემს", თქვა ინგოროყვას კლინიკის კლინიკურმა დირექტორმა კახაბერ ჭეილიძემ. 

შეგახსენებთ, ალექსი თირქია საავადმყოფოში სკალპის ღია ჭრილობით, შუბლის ძვლის და თვალბუდის ზედა კიდის მოტეხილობით და შუბლის წილის კონტუზიური დაზიანებით 3 დეკემბერს მიიღეს. მისი ბიძა, იოსებ ჩანადირი ჟურნალისტებთან ამბობს, რომ 22 წლის ახალგაზრდას, სავარაუდოდ, ე.წ გაზის კაფსულა წარბის არეში მოხვდა.

რამდენიმე დღის წინ, ჯანდაცვის მინისტრმა მიხეილ სარჯველაძემ ბრიფინგზე განაცხადა, რომ, თუ თირქიას უცხოეთში გადაყვანის საჭიროება იქნება, სახელმწიფო, სრულად აიღებს პასუხისმგებლობას.

ამავე თემაზე:

ექიმები წინასწარ პროგნოზს ვერ აკეთებენ, ყველაფერი ალექსის ორგანიზმზეა დამოკიდებული - აქციაზე დაშავებულის და

აქციის დაშლისას დაშავებული ზუგდიდელი ახალგაზრდა ინგოროყვას კლინიკაშია მოთავსებული

გრძელდება მედიკამენტოზური ძილი. სასიცოცხლო პარამეტრები ამ ეტაპისთვის სტაბილურია - ექიმი აქციის დაშლისას დაშავებულ ზუგდიდელ ახალგაზრდაზე