რუსეთის ეკონომიკური განვითარების სამინისტრომ, რუსეთთან საინვესტიციო ხელშეკრულების რატიფიცირებაზე უარის თქმის შემდეგ, აკრძალა ტურების გაყიდვა ოკუპირებულ აფხაზეთში.

რუსეთის ტუროპერატორთა ასოციაციის წარმომადგენელმა არტურ მურადიანმა, ამ ღონისძიებას „აფხაზურ ბიზნესთან საგანმანათლებლო მუშაობა“ უწოდა.

„როდესაც აფხაზეთში არეულობა დაიწყო, რუსეთის ეკონომიკური განვითარების სამინისტრომ გამოსცა აკრძალვა ჩვენს ტუროპერატორებზე აფხაზეთში ტურების გაყიდვაზე. მაგრამ უნდა გავითვალისწინოთ, რომ ტურისტებს აფხაზეთში ბილეთების დამოუკიდებლად ყიდვაში და იქ განსახლებაში არავინ უშლის ხელს. ამის არანაირი აკრძალვა არ არსებობს“, - ციტირებს მის სიტყვებს, რუსული პროპაგანდისტული გამოცემა Gazeta.ru.

ის აღნიშნავს, რომ „აფხაზეთი პოპულარულია, როგორც ულტრაბიუჯეტური მიმართულებას“. მისივე თქმით, აკრძალვის მოხსნა შეიძლება მოსალოდნელი იყოს მხოლოდ "საპრეზიდენტო" არჩევნების და „აფხაზეთში ერთგვარი სტაბილიზაციის შემდეგ“.

შეგახსენებთ, რომ აფხაზი ლიდერის, ასლან ბჟანიას გადადგომის და ე.წ. პარლამენტის მიერ საინვესტიციო ხელშეკრულების რატიფიცირების ჩაგდების შემდეგ, მოსკოვმა სოხუმს სრულად შეუწყვიტა დაფინანსება.