დღეს, 17 დეკემბერს, პროტესტის მე-20 დღეს, ზუგდიდში, მიუხედავად წვიმიანი ამინდისა, სამხარეო ადმინისტრაციის წინ, მოქალაქეები შეიკრიბნენ ფერადი ქოლგებითა და საწვიმრებით და საპროტესტო აქციას მართავენ.

მოთხოვნა უცვლელია - ისინი სოლიდარობას უცხადებენ რეჟიმის პატიმრებს, მოითხოვენ ხელახალ არჩევნებს და ევროინტეგრაციის გზაზე დაბრუნებას.

აქციაზე სიტყვით გამოვიდნენ ადგილობრივი სამოქალაქო ორგანიზაციების წარმომადგენლები და აქტივისტები.

სამხარეო ადმინისტრაციიწ წინ, სამართალდამცავებიც იმყოფებიან. დემონსტრანტები აღნიშნავენ, რომ მიუხედავად ცივი ამინდისა, აქ რჩებიან და დაშლას არ აპირებენ.

აქციის ერთ- ერთმა ორგანიზატორმა, არჩილ თოდუამ  აღნიშნა, რომ პროტესტის ლოკაცია  და შეკრების დრო იცვლება. მან  ხვალ, 18 დეკემბერს, ზუგდიდის მუნიციპალიტეტის მერიის წინ,  16 საათზე მორიგი აქცია დააანონსა. 

შეგახსენებთ, მას შემდეგ, რაც 28 ნოემბერს, ირაკლი კობახიძემ განაცხადა, რომ 2028 წლის ბოლომდე საქართველო ევროკავშირთან მოლაპარაკებების გახსნის საკითხს დღის წესრიგში არ დააყენებს, თბილისსა და საქართველოს სხვადასხვა ქალაქში, მათ შორის, ზუგდიდში, საპროტესტო აქციები იმართება.

ამავე თემაზე:

ევროპა საქართველოს უალტერნატივო მომავალია - საპროტესტო მსვლელობა ზუგდიდში (ფოტო)

მშობლებს არ გავუზრდივართ რუსული მომავლისთვის - ზუგდიდის სკოლების მოსწავლეებმა საპროტესტო მსვლელობა მოაწყეს