ზუგდიდში, სახელმწიფო რწმუნებულის ადმინისტრაციის წინ, მოქალაქეებმა უწყვეტი პროტესტის 39-ე დღეს მდუმარე აქცია გამართეს. ამ ფორმით მათ პატივი მიაგეს ოკუპირებულ გალში ხანძრის შედეგად დაღუპული მოზარდების ხსოვნას.

აქციაზე არ იყო სიტყვით გამოსვლები და საპროტესტო შინაარსის სიმღერები. მოქალაქეებმა წუთიერი დუმილის შემდეგ მოისმინეს ორგანიზატორების მიმართვა.

"დღეს განსხვავებული პროტესტი გვაქვს. ძალიან მძიმე ფაქტი მოხდა ოკუპირებულ აფხაზეთში. ჩვენი თანამოქალაქეები მძიმე ვითარებაში გარდაიცვალნენ, მცირეწლოვანი ბავშვები. ამდენად, დღეს არ გვაქვს ჩართვა სიმღერების სახით. მშვიდად და წყნარად ვაგრძელებთ პროტესტს. 39-ე დღეა, გარეთ ვდგავართ წვიმაში და სიცივეში, მაგრამ მთელი ეს წინაღობა არ გვაშინებს, თუმცა დღეს დაღვრემილად. მძიმე დღეა თითოეული ჩვენგანისთვის. გამძლეობას ვუსურვებ დაღუპულთა ოჯახს, რადგან წარმოუდგენელია მსგავსი ჯოჯოხეთი ოჯახისთვის", - უთხრა რადიო "ათინათს" სამართლიანი არჩევნების" რეგიონულმა ხელმძღვანელმა დავით ლოგუამ.

"საერთაშორისო გამჭვირვალობა - საქართველოს" რეგიონული ოფისის ხელმძღვანელმა არჩილ თოდუამ შობის დღესასწაულზე დაგეგმილ საპროტესტო აქციაზე ისაუბრა და აღნიშნა, რომ, მძიმე ტრაგედიის გათვალისწინებით, შობის ღამეს სიმღერები არ იქნება და შესრულდება მხოლოდ საშობაო გალობა.

"დღეს ძალიან მძიმე ტრაგედია მოხდა ოკუპირებულ საბერიოში. ვიზიარებ ოჯახის დიდ ტკივილს. ვიცით, რომ ხუთი არასრულწლოვანის სიცოცხლე ემსხვერპლა ხანძარს. ჩვენი აქციები უწყვეტად გრძელდება, სანამ საბოლოო შედეგი მიღწეული არ იქნება. მკაფიოდ გვაქვს გაცხადებული რისთვის ვიბრძვით: ეს არის უკანონოდ დაპატიმრებულების გათავისუფლება, ხელახალი არჩევნები და ყველა იმ უწყების რეფორმა, რამაც უნდა მოგვცეს გარანტია, რომ ახალი არჩევნები თავისუფალ და დემოკრატიულ გარემოში ჩატარდება. ამ ბრძოლაზე გადის ჩვენი ქვეყნის მომავალი. ჩვენ არ გვინდა რუსულ ჭაობში ყოფნა. საქართველოს აქვს ამის გამოცდილება, რასაც ცუდის მეტი არაფერი არ მოუტანია. ოკუპაციას მოაქვს უმძიმესი შედეგები ყველასთვის, ოჯახებისთვის, ქვეყნისთვის და მომავლისთვის. ჩვენ არ უნდა დავუშვათ იმ მძიმე ტრაგიკული ისტორიული მომენტების გამეორება ჩვენს ქვეყანაში, რომელსაც საქართველო დღემდე იმკის", - გვითხრა თოდუამ.

შეგახსენებთ, დღეს, ოკუპირებული აფხაზეთის გალის რაიონის სოფელ საბერიოში ხანძარს ხუთი მოზარდის სიცოცხლე ემსხვერპლა.

ცნობისთვის, მას შემდეგ, რაც 28 ნოემბერს, ირაკლი კობახიძემ განაცხადა, რომ 2028 წლის ბოლომდე საქართველო ევროკავშირთან მოლაპარაკებების გახსნის საკითხს დღის წესრიგში არ დააყენებს, საქართველოს სხვადასხვა ქალაქში, მათ შორის ზუგდიდში, პერმანენტული საპროტესტო აქციები იმართება.