ზუგდიდის ტექნოპარკმა ონლაინ სტრიმის საშუალებით ღონისძიებას უმასპინძლა, სადაც USAID Zrda პროექტის მხარდაჭერით და Start up grind Tbilisi-ს ორგანიზებით ახალგაზრდა ლიდერთა ტოპ 10-ში დასახელებულმა ქართველმა მეწარმემ ვალერი ჩეხერიამ შეკრებილებს საკუთარი გამოცდილება გაუზიარა. წარმატებული ქართული სასტუმროს ბრენდების შემქმნელმა და აჭარა ჯგუფის გენერალურმა დირექტორმა კარიერული განვითარების გზასა და სამომავლო გეგმებზე ისაუბრა. ჩეხერია გასულ წელს ახალგაზრდა გლობალურ ლიდერთა ტოპ-10-ში დასახელდა და მის შესახებ სტატიები გამოქვეყნდა ისეთ საერთაშორისო მედია საშუალებებში, როგორიცაა Forbes, The Financial, Emerging Europe.

„Startup Grind” უწევს ორგანიზებას, როგორიცაა ქართველ მეწარმესთან შეხვედრა. ძალიან მნიშვნელოვანი შესაძლებლობაა ადგილობრივი მეწარმეებისთვის, რომ ცოდნა და გამოცდილება, რომელსაც ფლობენ ამ მიმართულებით, გაუზიარონ ერთმანეთს. ვალერი ჩეხერიას კი ბევრი აქვს სათქმელი მეწარმეებისთვის, რომლებიც აპირებენ განავითარონ საკუთარი ბიზნესი და მსგავსი ტიპის შეხვედრები მნშვნელოვანია ადგილობრივებისთვის“, - თქვა ტექნოპარკის მენეჯერმა ანუკი ასათიანმა.

შეხვედრას თბილისში, კონსერვატორიაში 500-მდე, ზუგდიდში კი 100-მდე მეწარმე დაესწრო. ისინი ტექნოპარკში გამოცდილების გაზიარებისა და სასარგებლო კონტაქტების დასამყარებლად შეიკრიბნენ.

„მაშინ, როცა ბიზნესს იწყებ, მნიშვნელოვანია მსგავსი შეხვედრები, რადგან წარმატებული ადამიანი გიყვება მის მიერ განვლილ გზაზე, რაც, თითქოს, გიადვილებს სტრატეგიების და ხედვების დაგეგმვას, რომ მომავალში პრობლემას მსუბუქად აუარო გვერდი და ასევე მსუბუქად დახვდე გამოწვევებს“, - აღნიშნა „ციცის სახელოსნოს“ დამფუძნებელმა.

„ეს ყველაფერი მასტიმულირებელია და ფონის შემქმნელი, რომელიც შემდეგ წარმატებაზე აისახება. აუცილებელია და საჭიროა რეგიონისთვის მსგავსი შეხვედრები, რადგან ადგილობრივი მეწარმეები ენთუზიაზმით არიან ჩართულები ამ პროცესში“, - გვითხრა სამეგრელო-ზემო სვანეთის დანიშნულების მართვის ორგანიზაციის პროექტების მენეჯერმა ედუარდ ფარცვანიამ.

ღონისძიებაზე ადგილობრივი მეწარმეები, სასტუმროს მენეჯერები, სტარტაპები და ტურიზმის სფეროს წარმომადგენლები იმყოფებოდნენ.