„ასოციაცია სოფლის მეურნეობის განვითარებისათვის“ ცენტრში, PPD შეხვედრა ჩატარდა, რომლის ფარგლებშიც სოფლის მეურნეობის სხვადასხვა დარგის შესაძლებლობებზე, არსებულ პრობლემებსა და მათი გადაჭრის გზებზე იმსჯელეს.

შეხვედრას სურსათის უვნებლობის სამსახურის, ფერმერთა მომსახურების ცენტრების, საინფორმაციო-საკონსულტაციო სამსახურების წარმომადგენლები, სოფლის მეურნეობის დარგში ჩართული ბიზნესმენები და ფერმერები ესწრებოდნენ.

„აგროსერვისის“ წარმომადგენელი მაია ალექსიძე განმარტავს, რომ პროგრამის მიზანია სოფლის მეურნეობის პროდუქტების ბაზრით დაინტერესებული მხარეების მხარდაჭერა ბაზარზე უკეთესი წვდომის გასავითარებლად, სოფლის მეურნეობის მიმწოდებელი ორგანიზაციების ცოდნის გაზრდა ნიადაგის მენეჯმენტში, ცნობიერების ამაღლება მაღალი ხარისხის, თანამედროვე სასოფლო-სამეურნეო ტექნოლოგიებისა და სოფლის მეურნეობის მანქანა-დანადგარების შესახებ და ინფორმაციის გავრცელება სოფლის მეურნეობის პროდუქტებისა და მექანიზმების შესახებ.

მისივე თქმით, მსგავსი შეხვედრების ჩატარება და რეგულარული ინფორმაციის გავრცელება სასოფლო-სამეურნეო მასალის მომხმარებლებისათვის და პროცესის მდგრადობისთვის ძალიან მნიშვნელოვანია. ის განმარტავს, რომ შეხვედრებზე გამოთქმული მოსაზრებების და წამოჭრილი პრობლემების შესახებ ინფორმაცია დამუშავდება და შესაბამის უწყებებს ინიციატივის სახით მიეწოდება.

შეხვედრაზე მონაწილეების თითოეულმა ჯგუფმა საკუთარ ჭრილში წამოწია პრობლემები და დასახა მათი გადაჭრის გზები. პრობლემები, რომელიც პესტიციდების მოხმარებასთან დაკავშირებით დასახელდა ასეთია:

ფერმერთა და მწარმოებელთა განათლების და ცნობიერების დაბალი დონე;

პესტიციდების რეალიზატორთა(კონსულტანტთა) კვალიფიკაციის დონის შეუსაბამობა მათ მიერ განხორციელებულ საქმიანობასთან (არასწორი რეკომენდაციები, რაც იწვევს ზედმეტ დანახარჯებს, დაბალ მოსავალს და უხარისხო პროდუქციას);

პრობლემები ექსტენციის მიმართულებით; არ არსებობს სამუშაო პროგრამა; კადრი არასაკმარისია და მათი მოვალეობა მხოლოდ ექსტენცია არაა.

პროდუქციის ხარისხის კონტროლის მექანიზმის არ მუშაობს; (ხარისხიანს და უხარისხოს ერთი ფასი აქვს, რაც მოტივაციას უკარგავს ხარისხიანი პროდუქციის მწარმოებელს);

შეხვედრის ორგანიზატორების ინფორმაციით, გამოიკვეთა პრობლემის გადაჭრის გზები, რაც საჯარო სექტორის დახმარებით უნდა განხორციელდეს:

განისაზღვროს ფერმერის სტატუსი და ამ სტატუსის უპირველესი განმსაზღვრელი იყოს ცოდნა, სახელმწიფო და საერთაშორისო პროგრამებში ჩასართავად აუცილებელი მოთხოვნა იყოს ცოდნა;

ჩატარდეს კვალიფიციური ტრენინგები;


შეიქმნას ერთიანი საინფორმაციო ბაზები, სადაც იქნება ინფორმაცია თითოეული ფერმერის შესახებ, ფართობი, კულტურა, რის მიხედვითაც მოხდება ფერმერის მიერ გამოყენებული პესტიციდების რაოდენობის კონტროლი;

ჩამოყალიბდეს/გაძლიერდეს ექსტენციის სამსახურები, შემუშავდეს ამ სამსახურების სამუშაო პროგრამა და აღიჭურვონ ძალიან მაღალკვალიფიციური კადრებით და შესაბამისი ინფრასტრუქტურით.

მოხდეს საშუალო ფერმერების ფინანსური ხელშეწყობა სოფლის მეურნეობაში საჭირო სხვადასხვა ანალიზის აღებაში.

გაკონტროლდეს პესტიციდების მოხმარებასთან დაკავშირებული არსებული რეგულაციების შესრულება;

სარეალიზაციო ქსელებში დასაქმებულ კონსულტანტთა კვალიფიკაციის ამაღლება და მათი საქმიანობის კონტროლი;

გადაიხედოს სახელმწიფო პროგრამების ეფექტურობის შეფასების გზები: შეფასდეს არა რამდენი ბაღი გაშენდა, არამედ რა მოსავალი მივიღეთ და რა ეკონომიკური მოგება მიიღო ფერმერმა და ქვეყანამ.

შეხვედრა ამერიკის შეერთებული შტატების საერთაშორისო განვითარების სააგენტოს (USAID) სოფლის მეურნეობის პროგრამის ფარგლებში ჩატარდა.

​