დღეს, ზუგდიდში, 18:30 საათზე, გამომცემლობა „ინტელექტის“ ორგანიზებით, სოციალურ საწარმო „მეგობარში“ მწერალ, დრამატურგ და რეჟისორ ნინო ხარატიშვილთან შეხვედრა გაიმართება. ამის შესახებ ინფორმაციას გამომცემლობის ფეისბუქ გვერდზე ვკითხულობთ.

მათივე ცნობით, ღონისძიების ფარგლებში, მწერალი საკუთარ ბესტსელერებზე ისაუბრებს.

„გამომცემლები, მწერლები, მთარგმნელები და ლიტერატურის სფეროს სხვა წარმომადგენლები კვლავ ერთიანდებიან − საზოგადოების გასააქტიურებლად და ცნობიერების ასამაღლებლად საქართველოს მასშტაბით იწყებენ კამპანიას „წიგნები ზაფხულში“, - განმარტავს „ინტელექტი“.

როგორც ფეისბუქ გვერდზე ვეცნობით, პროექტი ხორციელდება საქართველოს პენცენტრის და საქართველოში აშშ-ის საელჩოს მხარდაჭერით, „წიგნები ზაფხულში“ კამპანიის ფარგლებში. შეხვედრაზე დასწრება თავისუფალია.

ინფორმაციისთვის, 2014 წელს ქართულ ენაზე პირველად გამოიცა გერმანულენოვანი ქართველი ავტორის ნინო ხარატიშვილის რომანი „ჟუჟა“, 2015 წელს – პიესების კრებული „ჩემი საშინელი ბედნიერების წელიწადი“ და რომანი „ჩემი საყვარელი ორეული“, 2019 წელს კი მისი გახმაურებული საერთაშორისო ბესტსელერი და არაერთი პრემიის ლაურეატი „მერვე სიცოცხლე“.