11 ოქტომბერს, ზუგდიდში დიაგნოსტიკურ ცენტრ "ჯან მედის" ორგანიზებით, ჯანდაცვის საერთაშორისო სიმპოზიუმი "სტამბოლი-ზუგდიდი" გაიმართა.

აღნიშნული ღონისძიების ფარგლებში, ზუგდიდში ჩამოვიდა თურქეთის კლინიკა "მედიქალ პარკის" წამყვანი ექიმების ჯგუფი , რომელმაც სამეგრელოს სხვადასხვა მუნიციპალიტეტიდან მოწვეულ 90-მდე ადგილობრივ ექიმს საკუთარი გამოცდილება და მედიცინაში არსებული ბოლო ტენდენციები გაუზიარეს.

კონფერენციაზე პრეზენტაციები წარმოადგინეს ტრანსპლანტოლოგმა - ბულენტ უნალიმ, ბავშვთა ნეფროლოგმა - აისელ ტაკტაკიმ, ბავშვთა გასტროენტეროლოგმა - ჰასრედ აიელდიზ ჯივინიმ და გინეკოლოგმა ირემ იამანიმ.

"დაახლოებით, 2007 წლიდან ვაკეთებ ორგანოს გადანერგვის ოპერაციებს, ვარ ექიმი ტრანსპლანტოლოგი. ჩამოსული ვარ აქაურ კოლეგებთან გამოცდილების გასაზიარებლად. მე და აქაურმა კოლეგებმა შევეცადეთ ერთმანეთისთვის ინფორმაციები და გამოცდილება გაგვეზიარებინა, უფრო ზუსტად, ცოცხალი ორგანოს გადანერგვაზე, რომელიც არ კეთდება ყველგან. თურქეთში, იმ კლინიკაში, სადაც მე ვმუშაობ, ძალიან ხშირად გვიწევს მსგავსი ოპერაციების ჩატარება პედიატრიულ ჯგუფში და სწორედ, ამ საკითხზე იყო დღეს ჩვენი შეხვედრის ერთ-ერთი მთავარი თემა ქართველ კოლეგებთან", - ამბობს პროფესორი ბულენტ უნალი. მისივე თქმით, შეხვედრის სასიამოვნო და საინტერესო კომპონენტი იყო კითხვა - პასუხის რეჟიმი, რომელიც გამოცდილების გასაზიარებლად, კომუნიკაციის ეფექტიანი მეთოდია. პროფესორი იმედოვნებს, რომ თურქ და ქართველ კოლეგებს შორის მეტი შეხვედრა დაიგეგმება, რაც მისი აზრით, ბევრ პაციენტს მისცემს ოქროს სტანდარტით მკურნალობის საშუალებას.

"ძალიან ამაყი და ბედნიერი ვარ აქ, თქვენთან ერთად ყოფნით. ჩემს კოლეგებს და აქაურ ექიმებს, თუ სურვილი ექნებათ ჩვენთან ვიზიტის, ძალიან სასიამოვნო იქნება ჩვენთვის მათი მასპინძლობა, სადაც მე ვმუშაობ. ერთად დავგეგმავთ ოპერაციებს, შევალთ ოპერაციებზე და ერთად განვიხილავთ მდგომარეობას. გავუზიარებთ ერთმანეთს აზრს და ვნახავთ შედეგს. ერთობლივი მუშაობით, ვფიქრობ, ძალიან ბევრ ავადმყოფს გადავარჩენთ, უფრო ზუსტად, ბოლო სტადიაში ღვიძლისა და თირკმლის დაავადებების მქონე პაციენტებს ", - დასძენს ის.

"ჯან-მედის" დირექტორი ლელა ქაჯაია ამბობს, რომ შეხვედრა ქალაქისთვის და რეგიონისთვის მნიშვნელოვანი იყო. მისი განმარტებით, სამომავლოდ "ჯან მედი" და "მედიქალ პარკი" მეტ ერთობლივ პროექტს განახორციელებენ ზუგდიდში. მისი თქმით, ასევე იგეგმება წამყვანი სპეციალისტების ვიზიტები.

"პირველი ვიზიტი შედგა ჰემატოლოგისა და ბავშვთა ორთოპედის. ჩვენი რეგიონისთვის ძალიან მნიშვნელოვანია ბავშვთა ნეფროლოგის ვიზიტი, რომელიც იგეგმება. ამ ეტაპზე, მივდივართ პედიატრიის კუთხით. შემდეგი ეტაპია ისევ სპეციალისტების ჩამოსვლა, იქნება დიდი შეხვედრები კოლეგებთან და ასევე, ჩვენი ვიზიტი ქალაქ სტამბოლში", - აღნიშნავს ქაჯაია. 

"ზუგდიდელთა ჯანდაცვის კავშირის" ხელმძღვანელის ლალი ივარდავას თქმით, თურქი სპეციალისტების მიერ გამოცდილების გაზიარება აუცილებელი პროცესია, რადგან თურქეთი მედიცინაში ინოვაციური მეთოდების დანერგვის კუთხით, გამორჩეული ქვეყანაა.

"ჩვენთვის ძალიან მნიშვნელოვანი იყო თურქი სპეციალისტების ვიზიტი. თქვენ იცით, რომ ჩვენი ორგანიზაცია თანამშრომლობს კლინიკა "ჯან მედისთან" და მინდა უღრმესი მადლობა გადავუხადო ჩამოსულ სტუმრებს. თურქეთი ერთ-ერთი მოწინავეა მედიცინაში ინოვაციური მეთოდების დანერგვის კუთხით და ჩვენ რა თქმა უნდა, ვაპირებთ მათთან თანამშრომლობას. დღევანდელი პრეზენტაცია შედგა. ჩვენი თანამშრომლობის კრედო კი გახლავთ მაღალი ხარისხი, ჩვენი ბენეფიციარების მომსახურება მნიშვნელოვანი ფასდაკლებებით და ის, რომ მოქალაქეები ჩვენი საქმიანობით იყვნენ კმაყოფილი", - ამბობს ივარდავა.

ქალაქ ზუგდიდში მოქმედი მულტიპროფილური დიაგნოსტიკური ცენტრი "ჯან-მედი", რომელიც აღჭურვილია ულტრათანამედროვე აპარატურით მრავალფეროვან სამედიცინო სერვისებს სთავაზობს სამეგრელო-ზემო სვანეთის მოსახლეობას.

ცენტრის მისამართია - ქ.ზუგდიდი, გამარჯვების ქ. #32.