26 ოქტომბერს, ზუგდიდში, არასამთავრობო ორგანიზაციის “Care კავკასიაში“ საპილოტე პროექტის „ფერმერთა საველე და ბიზნეს სკოლა“ (FFBS) შემაჯამებელი შეხვედრა გაიმართა. ღონისძიებაზე, რომელიც ასოციაციის „სოფლის მეურნეობის განვითარებისთვის“ (AFAD) ოფისში შედგა, FFBS-ის პროექტის მენეჯერმა ელისო ცხადაიამ ბენეფიციარებს წარუდგინა პრეზენტაცია FFBS-ის მიღწევებისა და შედეგების შესახებ, რომელიც საშუალო და მცირე შემოსავლის მეწარმეებს ბიზნეს საქმიანობის განვითარებაში დაეხმარა. „სამეგრელო-ზემო სვანეთის რეგიონში, ასევე, ცაგერისა და ლენტეხის მუნიციპალიტეტებში არასამთავრობო ორგანიზაცია “Care კავკასიაში“ ახორციელებდა საპილოტე პროექტს „ფერმერთა საველე და ბიზნეს სკოლა“. პროექტის ხანგრძლივობა იყო ორი წელი. ნოემბერში ეს პროექტი დამთავრდა და დღეს ჩვენ AFAD-ის ოფისში გვაქვს პროექტის დახურვა, საბოლოო შემაჯამებელი შეხვედრა, სადაც პრეზენტაციის სახით წარვადგინე ის მიღწევები და შედეგები, რომელიც ჰქონდა პროექტს. ჩვენ დავსახეთ სამომავლო გეგმებიც, მოვისმინეთ ჩვენი ბენეფიციარების მოსაზრებები, თუ რა მოეწონათ, რა იყო კარგი და ცუდი, რა ჯობდა სხვანაირად გაკეთებულიყო, იმედი მაქვს, ჩვენი თანამშრომლობა გაგრძელდება“, - თქვა - ელისო ცხადაიამ.

პროექტის სამართლებრივი ექსპერტი და ტრენერი ლელა კეშელავა ამბობს, რომ გარდა თეორიული და პრაქტიკული გამოცდილებისა, ბენეფიციარებმა მიიღეს დეტალური ინფორმაცია სამართლებრივი ურთიერთობების წარმოების შესახებ, რაც მათი ყოველდღიურ საქმიანობაში გამოყენების ეფექტური მექანიზმი გახდა.

„დღევანდელი შეხვედრაზე შეჯამდა პროექტი„ფერმერთა საველე და ბიზნეს სკოლა“. მქონდა შესაძლებლობა, მონაწილეობა მიმეღო აღნიშნულ პროექტში. ვიყავი ჩართული როგორც ტრენერი, ვინაიდან ფერმერების მხრიდან იყო სხვადასხვა მესიჯი. როდესაც ისინი ეწევიან სამართლებრივ ურთიერთობას, კერძოდ, მარცვლეულის მოწოდებასთან და ა.შ, წარმოეშვათ საჭიროება, რომ ჰქონოდათ საჭირო ცოდნა და უნარები სამართლებრივ საკითხებზე. პროექტმა ფერმერებს მისცა საშუალება, რომ ჩვენი ტრენინგების მეშვეობით მიეღოთ ინფორმაცია, თუ რა სამართლებრივი მექანიზმები არსებობს და როგორ შეიძლება ეს თავიანთ ყოველდღიურ საქმიანობაში გამოიყენონ. ერთობლიობაში, ეს იყო წარმატებული, საინტერესო და მნიშვნელოვანი პროექტი“, - ამბობს ის.

ფერმერთა საველე და ბიზნეს სკოლის (FFBS) მოდელი შემუშავებულია ქეა საერთაშორისოს გზამკვლევის საფუძველზე და ხორციელდება მსოფლიოს მრავალ ქვეყანაში. მისი მიზანია მცირე და საშუალო მეწარმეების შემოსავლის, მოგებისა და მედეგობის გაზრდა, გენდერულად ტრანსფორმაციული და კლიმატ- გონივრული სოფლის მეურნეობის მხარდაჭერით.