დე ფაქტო აფხაზეთის მეცნიერებათა აკადემიის ეკოლოგიის ინსტიტუტის დირექტორის რომან დბარის

და სოხუმის რაიონის მთავარი სანიტარული ექიმის ალა ბელიაევას განცხადებით, აფხაზეთში ზიკას ვირუსის გავრცელება გამორიცხული არ არის.

"ვირუსის გადამტანია კოღო Aედეს. უპირველეს ყოვლისა, გასარკვევია, ამ ჯიშის კოღოები რეალურად არიან თუ არა აფხაზეთში და შეუძლიათ თუ არა მათ ამ ვირუსის გადატანა, როგორია მათი პოპულაცია და ადამიანთან კონტაქტის სიხშირე. თეორიულად ასეთი პრობლემა ჩვენს რეგიონში არსებობს, მაგრამ რა ვითარებაა პრაქტიკაში, სპეციალურ შესწავლას საჭიროებს", - განაცხადა დბარმა.

მისივე თქმით, რუსეთის ტერიტორიის უდიდეს ნაწილში, სამხრეთის რეგიონების გამოკლებით, ვირუსის გადამტანი კოღეოების ჯიში არ არის გავრცელებული.

აფხაზი მეცნიერის განმარტებით, რუსეთში ვირუსი ვერ გავრცელდება, თუმცა აფხაზეთი რისკის ზონაშია.

"უნდა გავითვალისწინოთ გლობალური დათბობაც, რომლის დროსაც ცხოველების გავრცელების ბევრი არეალი დათბობის გამო ჩრდილოეთისკენ ინაცვლებს. ამ ჯიშის კოღოები სახლის სარდაფებშიც შეიძლება აღმოჩნდნენ, ნესტის გამო ისინი საკმაოდ აქტიურად მრავლდებიან, იმის გათვალისწინებით, რომ ეს უფრო თბილი ადგილებია, სადაც ლოკალური მიკროკლიმატის შექმნის პირობებია, რომელშიც შესაძლოა უფრო სამხრეთის წარმოშობის ორგანიზმები გავრცელდნენ... იმის თქმა, რომ ვირუსიი გავრცელება აფხაზეთში შეუძლებელია, ვფიქრობ, არასწორია", - აღნიშნა მან.

ალა ბელიაევა კი აღნიშნავს, რომ ვირუსს რუსეთის ინსტიტუტები შეისწავლიან და კონკრეტულ რეკომენდაციებს გასცემენ.
ბელიაევას თქმით, Aედეს-ს ჯიშის კოღო აფხაზეთში არსებობს, თუმცა კოღოს სხვა ჯიშებთან შედარებით, მათი რაოდენობა ძალიან მცირეა.

ვირუსი, რომელიც კოღოებს გადააქვთ, 2015 წელს ბრაზილიაში, შემდეგ კი სამხრეთ ამერიკის სხვა ქვეყნებში გავრცელდა. ყველაზე დიდ საშიშროებას ვირუსი ორსული ქალებისთვის წარმოადგენს, რადაგან ის ახალდაბადებულებში მიკროცეფალიით დაავადებას იწვევს.
ზიკას ვირუსის საწინააღმდეგო ვაქცინა ჯერ არ არსებობს.