პროექტის ,,პეტიცია-ხალხის ხმა თვითმმართველობაში“ პრეზენტაციის მიზნით, ასოციაცია ,,ათინათის“ აღმასრულებელი დირექტორი რუსუდან ყალიჩავა, პროექტის ღონისძიებების ორგანიზატორი მიხეილ როგავა, მესტიის მუნიციპალიტეტის საკრებულოს თავმჯდომარე მაიზერ ჯაფარიძეს, საკრებულოს თავმჯდომარის მოადგილეს ზაურ ჩართოლანს, მესტიის მუნიციპალიტეტის გამგებელ კაპიტონ ჯაფარიძესა და პროექტის სამიზნე სოფლების რწმუნებულებს შეხვდნენ.

შეხვედრის მონაწილეებმა თვითმმართველობის საქმიანობაში ადგილობრივი მოსახლეობის ჩართულობის მნიშვნელობასა და პროექტის ფარგლებში თანამშრომლობის პერსპექტივებზე იმსჯელეს.

თვითმმართველობის წარმომადგენელებმა თანამშრომლობაზე მზაობა გამოთქვეს და პროექტის დაწყება დადებითად შეაფასეს. აქვე აღნიშნეს, რომ მათთვის პრიორიტეტულია, მოსახლეობას ჰქონდეს ზუსტი ინფორმაცია იმ ბერკეტების შესახებ, რაც მათი პრობლემების მოგვარებას ხელს შეუწყობს.

შეხვედრაზე საკრებულოს რესურსებისა და ბიუჯეტირების პროცედურებთან ერთად განიხილეს ის ძირითადი პრობლემები, რაც მოსახლეობას აწუხებს.

შეხვედრის მონაწილეთა მხრიდან აღინიშნა, რომ მნიშვნელოვანია პროექტის ფარგლებში ისეთი პრობლემების იდენტიფიცირება, რომელთა გადაჭრა ხელეწიფება საკრებულოს, რათა გადაიდგას ქმედითი ნაბიჯები, ამა თუ იმ თემში არსებული მწვავე საკითხების მოსაგვარებლად.