10 სექტემბერს პირველად „ზუგდიდობის“ სახალხო დღესასწაული გაიმართება. ქალაქს აქამდე საკუთარი დღესასწაული არ ჰქონია. ზუგდიდქალაქობა განსაკუთრებულად აღინიშნება, ქალაქის რამდენიმე ადგილას სხვადასხვა კულტურული და სპორტული ღონისძიება გაიმართება.

„ზუგდიდობა 2016“ საზეიმო თეატრალიზებული მსვლელობით 12:00 საათზე გაიხსნება. მთელი დღის განმავლობაში ცენტრალურ ბულვარში ხალხური რეწვის ნიმუშები, ზუგდიდელ მხატვართა ნამუშევრები და ქალაქის ისტორიული ფოტოები გამოიფინება.

12:00 საათიდან 17:00 საათამდე ცენტრალურ ბულვარში, სხვადასხვა ადგილას ფოლკლორული და საბავშვო ანსამბლების კონცერტები გაიმართება.

„ზუგდიდობაზე“ თეატრალური წარმოდგენებით გაცოცხლდება ეკატერინე ჭავჭავაძის ჩამობრძანება, მთვარის მოტაცება, ასევე წარმოდგენილი იქნება ბერტა ფონ ზუტნერი და იოანე მეუნარგია. თეატრალური წარმოდგენები დადიანების სასახლეთა ისტორიულ-არქიტექურული მუზეუმის ეზოში 13:00 საათიდან დაიწყება.

საპატიო სტუმრების მიღების ცერემონიალი, ზუგდიდში დადიანების სასახლეთა ეზოში 16:00 საათზე გაიმართება. პირველ "ზუგდიდობას" მთავრობის წევრები, პარლამენტარები და სხვადასხვა ქვეყნის ელჩები დაესწრებიან.

ზუგდიდის ცენტრალურ ბულვარში 16:00 საათზევე რეზო ბულიას სახელობის ქორეოგრაფიულ ანსამბლ „ჩელას“ვარსკვლავი გაიხსნება. ზუგდიდის ბულვარში ეს პირველი ვარსკვლავი იქნება.

16:15 საათზე დადიანების სასახლეთა ისტორიულ-არქიტექტურული მუზეუმის ეზოში სიმებიანი კვარტეტის კონცერტი დაიწყება.

17:00 საათზე კი საპატიო ზუგდიდელის დაჯილდოების საზეიმო ცერემონიალი და კონცერტი „ზუგდიდობა 2016“ - დადიანების სასახლეთა ეზოში გაიმართება. სადაც მონაწილეობას დავით ევგენიძე, ლიზა ბაგრატიონი, ნატო მეტონიძე და ანსამბლი „ოდოია“ მიიღებენ. საღამოს წამყვანები ეკა ხოფერია, ლევან ხურცია და მირიან ჯეჯელავა იქნებიან.

21:00 საათზე კი „CHECK IN GEORGIA“-ს ფარგლებში ზუგდიდის ცენტრში კონცერტი გაიმართება, რომელშიც მონაწილეობას ქართული ნაციონალური ბალეტი „სუხიშვილები“, ელენე ფოჩხუა, თემო საჯაია, სოფო ბედია, ბორის ბედია და ანსამბლი „ფორტე“ მიიღებენ.

"ზუგდიდობის" ორგანიზატორი ქალაქ ზუგდიდის მერია და მუნიციპალიტეტის გამგეობა არიან. "ზუგდიდობა 2016"-ის მთავრი რეჟისორი ბასა ფოცხიშვილია.