ზუგდიდის გამგეობის პრეს-სამსახურის უფროსმა და „რესპუბლიკური პარტიის“ ადგილობრივი ოფისის თავმჯდომარემ მაია ღურწკაიამ დემოკრატიული ჩართულობის ცენტრში გამართულ შეხვედრაზე განაცხადა, რომ გამგეობის თანამშრომლებს „ქართული ოცნების“ შტაბში იბარებენ. მისივე თქმით, საჯარო მოხელეებს შტაბის უფროსი ლაშა გვასალია ხვდება და ეუბნება, რომ სუს-ის ინფორმაციით, ისინი არასაიმედო თანამშრომლები არიან და მმართველი პარტიის სასარგებლოდ არ მუშაობენ.

„რატომ უნდა ჰქონდეს პარტიის რომელიმე ორგანიზაციას სუს-ისგან ინფორმაცია, რომელი თანამშრომელი ვის აძლევს ხმას, ან ვის მხარდასაჭერად მუშაობს“, - თქვა ღურწკაიამ.

ამასთან, მისი ინფორმაციით, გამგეობასა და მერიაში ანკეტები დარიგდა,რომელშიც თანამშრომლებს უნდა ჩაეწერათ იმ ხუთი ადამიანის პირადი მონაცემი, რომელიც 8 ოქტომბრის არჩევნებზე ხმას „ქართულ ოცნებას“ მისცემს.

„ქართული ოცნების“ შტაბის უფროსი ლაშა გვასალია რესპუბლიკელების ბრალდებებს უარყოფს და მას აბსურდულს უწოდებს.

„გული მეტკინა, რომ ასეთი სისულელე ისაუბრა. მე ვინ ვარ, რომ მსგავსი ინფორმაცია მქონდეს ან რა წვდომა უნდა მქონდეს სუს-თან, უბრალოდ, მარცხდებიან მეგობრები და შეტევაზე გადმოდიან“, -აღნიშნა გვასალიამ.
მაია ღურწკაიას ბრალდებებს ასევე უარყოფენ მუნიციპალიტეტის გამგეობაში. გამგებლის მოვალეობის შემსრულებლის მამუკა წოწერიას თქმით, ასეთი მითითება არ გაცემულა და ბრალდება უსაფუძვლოა.