ზუგდიდის რაონულ საავადმყოფოში ჩასახლებული დევნილების, რომლებიც კვირაზე მეტია სახელდახელოდ აგებულ კარავში შიმშილობენ, ჯანმრთელობის მდგომარეობა გაუარესდა.ისინი დევნილთა პოლიკლინიკის ექიმებმა მოინახულეს და შიმშილობის დაუყონებლივ შეწყვეტა ურჩიეს.

"ჩვენამდე სასწრაფო დახმარების ექიმები ყოფილან და პირველადი დახმარება აღმოუჩენიათ. ერთ-ერთს საავადმყოფოში გადაყვანა შესთავაზეს, თუმცა თქვა. ამჟამად მათი მდგომარეობა სტაბილურია, თუმცა არ შეიძლება ამ ადამიანების ამ პირობებში ყოფნა", - თქვა დევნილთა პოლიკლინიკის ექიმმა ნოდარ კვირკველიამ.

დევნილები აცხადებენ, რომ შიმშილობას და საპროტესტო აქციებს მანამდე არ შეწყვეტენ, სანამ მათი მოთხოვნა არ დაკმაყოფილდება.

"არსად არ წავალ აქ უნდა მოვკვდე, თავი მაქვს განწირული", - უთხრა ჟურნალისტებს დალი შონიამ.

აქციის მონაწილეები 2 თებერვალს თბილისში გამგზავრებას და აქციის გაგრძელებას ევროკავშირის ოფისთან გეგმავდნენ, თუმცა დღეს უკვე აცხადებენ, რომ ჯანმრთელობის გაუარესების გამო, წასვლა ვერ შეძლეს.

აფხაზეთიდან იძულებით გადაადგილებული პირები, რომლებიც, ამავე დროს, სოციალურად დაუცველები არიან, მათთვის სპეციალური კომისიის მიერ მინიჭებულ ქულებს აპროტესტებენ და საცხოვრებელი ფართებით უზრუნველყოფას ითხოვენ.


ამავე თემაზე:

ზუგდიდში დევნილები შიმშილობენ (ვიდეო) 

ზუგდიდში რამდენიმე დევნილმა პირი ამოიკერა (ვიდეო)

მოშიმშილე დევნილები აქციის გაგრძელებას თბილისში გეგმავენ (ვიდეო)