რაიონული საავადმყოფოს ყოფილ შენობაში ჩასახლებული დევნილები, რომლებიც ორ კვირაზე მეტ ხანს შიმშილობდნენ, დღეს აჭარისა და სამეგრელო-ზემო სვანეთის დევნილთა სამმართველოს უფროსს მანუჩარ ჩილაჩავას შეხვდნენ. ჩილაჩავამ ისინი საკუთარ კაბინეტში სათითაოდ მიიღო და ქულებთან დაკავშირებული პრეტენზიები პირადად მოისმინა. შეხვედრას რეგიონში მომუშავე საზოგადოებრივი ორგანიზაციის წარმომადგენლები დაესწრნენ.

ჩილაჩავას თქმით, მან აქციის მონაწილეებს აუხსნა, თუ რის საფუძველზე დააკლდათ მათ ქულები და რატომ ვერ მიიღებენ ისინი ამ ეტაპზე საცხოვრებელ ფართებს.

„ამ დევნილების აპლიკაციებს სამინისტროში ხელახლა გადახედავენ და შეისწავლიან. შეიძლება მათ მიერ წარმოდგენილ დოკუმენტაციაში ხარვეზები იყო, ეს ყველაფერი ხელახლა გადაიხედება და მათ საბოლოო ქულები უახლოეს 10 დღეში დაუდგინდებათ“,- განაცხადა მან.

დევნილების თქმით, მათთვის ქულების მინიჭებისას, სხვა ფაქტორებთან ერთად, კომისიამ, ასევე არ გაითვალისწინა შენობის მესაკუთრის წერილი, სადაც ის მათ გასახლებას ითხოვდა. აღნიშნულთან დაკავშირებით, კითხვები საქართველოს ახალგაზრდა იურისტთა ასოციაციის ზუგდიდის ოფისის ხელმძღვანელს ჯემალ ჭკადუასაც ჰქონდა. მისი თქმით, მესაკუთრის მიერ განსახლების მოთხოვნის შემთხვევაში, საკითხი უნდა განხილულიყო და შესაბამისად დევნილებს ქულები უნდა დამატებოდა, რაც მათ ბინების მიღებაში შეუწყობდა ხელს.

თავის მხრივ სამმართველოს უფროსი აცხადებს, რომ მესაკუთრემ მათთან ოფიცალური წერილი დაგვიანებით, 2016 წლის 27 დეკემბერს შეიტანა, რის გამოც ის აღნიშნული დევნილების დოკუმენტებში ვერ აისახა. მისივე განმარტებით, ამ გარემოებას, სავარაუდოდ, ქულების ხელახალი განხილვისას გაითვალისწინებენ.

შეხვედრის დასრულების შემდეგ, დევნილებმა ჟურნალისტებს უთხრეს, რომ ისინი მათთვის მინიჭებული ქულების გადამოწმებას დაელოდებიან, თუმცა აქციების შეწყვეტას და კარავის დაშლას, სადაც ისინი შიმშილობდნენ, არ აპირებენ.

„კარავი ადგილზე რჩება სანამ კონკრეტულ პასუხს არ მივიღებთ“, - ამბობენ ისინი.

ცნობისთვის, აფხაზეთიდან იძულებით გადაადგილებული რამდენიმე ადამიანი, ჩასახლების ეზოს სახელდახელოდ აგებულ კარავში, ორ კვირაზე მეტია შიმშილობდა. ისინი მათთვის მინიჭებული ქულების გადამოწმებას და საცხოვრებელი ფართებით უზრუნველყოფას ითხოვენ.