საავტომობილო გზების დეპარტამენტს ანაკლიის ღრმაწყლოვან პორტამდე მისასვლელი გზის და რკინიგზის მშენებლობის პროექტირებაზე საერთაშორისო ტენდერის შეწყვეტა მოუწია. აღნიშნული გადაწყვეტილება მას შემდეგ იქნა მიღებული, რაც ტენდერის რამდენიმე პირობა ერთ-ერთმა კომპანიამ გაასაჩივრა. შპს „ჯი-თი“ მიიჩნევს, რომ ტენდერში დისკრიმინაციული ჩანაწერია და ქმნის არაკონკურენტულ გარემოს. საჩივარი შესყიდვების სააგენტოს დავების საბჭოს კომისიამ ნაწილობრივ დააკმაყოფილა.

კომპანიამ სატენდერო დოკუმენტაციის ის ნაწილი გაასაჩივრა, რომელშიც პრეტენდენტის გამოცდილების შესახებ მოთხოვნებია ჩამოთვლილი.

„ჯი-თი“თვლის, რომ აღნიშნული პირობები ეწინააღმდეგება საქართველოს სახელმწიფო შესყიდვების შესახებ კანონის რამდენიმე მუხლს, მათ შორის, პუნქტს, რომელიც სახელმწიფო შესყიდვების განხორციელებისას შესყიდვების მონაწილეთა მიმართ პროპორციულ, არადისკრიმინაციულ მიდგომასა და თანასწორ მოპყრობას უზრუნველჰყოფს. გარდა ამისა, საჩივარში აღნიშნულია, რომ მოთხოვნები ელექტრონული ტენდერის ჩატარების წესის რამდენიმე მუხლსა და კონკურენციის შესახებ საქართველოს კანონის მუხლებსაც ეწინააღმდეგება.

კომპანიაში მიიჩნევენ, რომ სატენდერო მოთხოვნების ნაწილი არ ემსახურება შემსყიდველი ორგანიზაციის საჭიროებას, იწვევს დისკრიმინაციულ, არათანასწორ მოპყრობას მიმწოდებლების მიმართ და ხელს უწყობს არაკონკურენტიანი გარემოს შექმნას. სწორედ ამიტომ „ჯი-თი“ დავების საბჭოს პირობების გაუქმება ითხოვა.

დავების საბჭომ აღნიშნული საჩივარი განიხილა და ნაწილობრივ დააკმაყოფილა. ამასთან, საბჭომ დაადგინა, რომ საავტომობილო გზების დეპარტამენტმა უნდა იმსჯელოს სატენდერო დოკუმენტაციის სადავო მოთხოვნების, მათი მიზნებისა და მიზანშეწონილობის შესახებ და მხოლოდ ამის შემდეგ მიიღოს გადაწყვეტილება სახელმწიფო შესყიდვების მარეგულირებელი კანონმდებლობის სრული დაცვით.

თავის მხრივ, საავტომობილო გზების დეპარტამენტში აცხადებენ, რომ მაღალი საზოგადოებრივი და სახელმწიფო ინტერესიდან გამომდინარე, აღნიშნულ სატენდერო პირობებს გადახედავენ. ამასთან, კანონმდებლობის შესაბამისად, სატენდერო დოკუმენტაციაში ცვლილება ვერ განხორციელდება, ამიტომაც კომისიის წევრებმა მიზანშეწონილად ჩათვალეს, რომ გადასინჯვის პროცესში ტენდერი შეეწყვიტათ.

უწყებაში რადიო „ათინათს“ უთხრეს, რომ საჭიროების შემთხვევაში, შესაძლოა, სადავო პირობები შეცვალონ. დეპარტამენტში პირობების რომელიმე კომპანიისთვის შესაძლო მორგების ფაქტს კატეგორიულად უარყოფენ და ამბობენ, რომ ტენდერი ხელახლა გამოცხადდება.



ანაკლიის ღრმაწყლოვან პორტამდე მისასვლელი გზისა და რკინიგზის პროექტირების ტენდერი პირველად გასული წლის დეკემბერში გამოცხადდა, თუმცა ის არ შედგა. მეორედ საავტომობილო გზების დეპარტამენტმა ტენდერი მიმდინარე წლის თებერვალში გამოაცხადა. პროექტირების შესყიდვის სავარაუდო ღირებულება 10 998 972 ლარია.

სატენდერო დოკუმენტაციის თანახმად, გზისა და რკინიგზის მშენებლობისთვის შესაბამისი ინფრასტრუქტურა ზუგდიდის მუნიციპალიტეტის სოფელ ცაცხვსა და ანაკლიას შორის უნდა მოეწყოს. ამავე დოკუმენტაციის მიხედვით, პირველ ეტაპზე დაგეგმილია პორტამდე მისასვლელი ორზოლიანი გზის მშენებლობა, რომლის სიგანე 11 მეტრი იქნება. საგზაო ინფრასტრუქტურის პროექტი საავტომობილო გზის მთელ სიგანეზე, რაც 30 მეტრიან კორიდორს ითვალისწინებს, განსახლების სამოქმედო გეგმასაც მოიცავს.

რაც შეეხება სარკინიგზო ინფრასტრუტურას, ოპერირების პირველ ეტაპზე გათვალისწინებულია მინიმუმ ერთი ელექტროფირებული სარკინიგზო ხაზისა და სხვა დამხმარე სარკინიგზო ინფრასტრუქტურის მშენებლობა (17-18კმ). გარდა ამისა, აღნიშნული ეტაპი განსახლების სამოქმედო გეგმისა და საპროექტო ბუფერის მომზადებასაც მოიცავს.

ამავე თემაზე:

ანაკლიის პორტამდე მისასვლელი გზის პროექტირებაზე ტენდერი ხელახლა გამოცხადდა